விசுவாசம், விடாமுயற்சி, தைரியம், புத்தி, சக்தி, பராக்கிரமம் ஆகிய ஆறு சத்குணங்கள் எந்த மனிதனிடம் பிரகாசிக்கின்றனவோ, இறைவன் அவனுடன் கூடவே இருந்து அவனை எல்லாவிதத்திலும் காத்தருள்வான். எந்தக் காலத்திலும், எந்தப் பிரதேசமானாலும், எந்த சூழ்நிலையிலும், இந்த ஆறு சத்குணங்களும் மிகவும் அத்தியாவசியமானவை. இந்த சத்குணங்களைக் கொண்ட மனிதனை எந்நாளும் எந்தக் கவலையும் பின்தொடராது. இந்த ஆறு சத்குணங்களும், கல்வியினாலோ, குருவின் போதனையாலோ பெறப்படுபவை அல்ல. தாய் தந்தையரிடமிருந்தும் இதைப் பெற முடியாது. இவற்றை ஆத்ம விசுவாசத்தினால் மட்டுமே பெற முடியும். நமது அன்றாட வாழ்க்கையில், சாதாரணமாக ஒரு கடிதத்தை அஞ்சல் துறையின் மூலம் அனுப்புவதிலேயே, நமது நம்பிக்கை இருப்பதைக் காணலாம். அஞ்சல் துறையின் மீது நம்பிக்கை இல்லையென்றால் எவரும் அதன் மூலம் கடிதத்தை அனுப்ப மாட்டார்கள். கடிதத்தில் குறிப்பிடப்பட்ட விலாசத்திற்கோ, அதில் ஒட்டப்பட்ட ஸ்டாம்புகளுக்கோ, அருகில் இருப்பவை, தொலைவில் இருப்பவை எனும் வித்தியாசங்கள் கிடையாது. அதைப் போலவே, இறைவனுக்கும், அருகில் உள்ளவர், தொலைதூரத்தில் உள்ளவர் என்ற பேதங்கள் கிடையாது. நம்முடைய ‘விசுவாசம்’ என்ற விலாசம் சரியாக எழுதப்பட்டிருக்க வேண்டும். இந்த விசுவாசம் நிலையானதாக, பரிபூரணமானதாக, எந்தவிதமான சந்தேகத்திற்கும் இடமில்லாததாக இருக்க வேண்டும். இந்த விசுவாசம் என்ற விலாசம் சரியாக எழுதப்பட்ட கடிதத்தின் மீது, தன்னலமற்ற, இதயபூர்வமான ‘ப்ரேமை’ எனும் ஸ்டாம்ப் ஒட்டப்பட்டிருக்க வேண்டும். சுயநலத்துடன் கூடிய ப்ரேமையெனும் ஸ்டாம்ப் எந்தவிதத்திலும் உபயோகமற்றதே. உறுதியான நம்பிக்கை தன்னலமற்ற அன்போடு இணைந்திருக்கும்போது, பகவானுக்குச் செலுத்தப்படும் பிரார்த்தனைகள் அவரைச் சென்றடைந்தே தீரும். . (தெய்வீக அருளுரை, டிசம்பர்25, 1997)