சர்வ சக்தி ஸ்வரூபிணியான மாத்ரு மூர்த்தியை நாம் கௌரவித்து, நேசிக்க வேண்டும் என்பது ஒவ்வொரு மனிதனின் கடமையாகும். இந்த பவித்ரமான அருட்செய்தியை உலகனைத்திற்கும் எடுத்துரைப்பதே இந்த தேவி நவராத்திரியின் நோக்கமாகும். ஆதிபராசக்தியே, துர்கா, லட்சுமி, சரஸ்வதி என்று மூன்று தேவிகளாகத் தோன்றுகிறாள். துர்கா என்றால் சக்தி ஸ்வரூபிணி - அதாவது, சரீர, மானசீக, ஆன்மிக சக்தி ஆகியவற்றை அருள்பவள். லக்ஷ்மி - ஞான ஐஸ்வர்யம், குண ஐஸ்வர்யம் மற்றும் உலகியலாக நாம் அனுபவிக்கும் அநேகவிதமான ஐஸ்வர்யங்களையும் அனுக்கிரஹிப்பவள். உடல் ஆரோக்கியம் கூட ஐஸ்வர்யமே. அனைத்து ஐஸ்வர்யங்களின் ஸ்வரூபிணியே லக்ஷ்மி. சரஸ்வதி நமக்கு அறிவாற்றல், பகுத்தறியும் சக்தி, புத்தி சக்தி ஆகியவற்றை அருள்பவள். இந்த தேவியரின் மகத்துவத்தை உலகிற்கு எடுத்துரைப்பதற்கும் அருள்வதற்கும் இந்த நவராத்திரி பண்டிகை கொண்டாடப்படுகிறது. நமது அன்னையும் இம்மூவரின் ஸ்வரூபமே. குழந்தைக்குத் தேவையான சக்தி, செல்வம் மற்றும் புத்தியை அன்னையே அளிக்கிறாள். வாழ்க்கையில் நாம் முன்னேற்றமடைய வேண்டும் என்றே அவள் எப்போதும் விரும்புகிறாள். எனவே நம் மாத்ரு மூர்த்தியான அன்னையே நவராத்திரியின் போது ஆராதிக்கப்படும் முப்பெரும் தேவியரின் ஸ்வரூபமாக விளங்குகிறாள்! (தெய்வீக அருளுரை, அக்டோபர்14, 1988)