அறியாமையை விலக்கி விடுங்கள் - பிறகு அந்தத் தருணமே நீங்கள் எல்லாப் பந்தங்களிலிருந்தும் விடுதலை பெற்று விடுவீர்கள். அனைத்து ஆன்மிக சாதனைகளும் இந்த மோட்சத்தையே தங்கள் குறிக்கோளாகக் கொண்டுள்ளன. நாமசங்கீர்த்தனமும் இந்த அடிப்படை அறியாமையைப் போக்க உதவுகிறது. பகுத்தறிவு அல்லது அறிவியலின் வரையறுக்கப்பட்ட விதிகள் ஆகியவற்றை மட்டுமே நம்பியிருப்பவர்கள், வெறும் ஒலியாக மட்டுமே இருக்கும் இறைநாமத்தைத் திரும்பத் திரும்பக் கூறுவதால், மனிதனின் மனதைத் தூய்மைப்படுத்தவோ திருத்தவோ முடியாது என்று வாதிடுகின்றனர். ஆனால் இறைவனுடைய திருநாமம் வெறும் ‘ஒலி’ மட்டுமல்ல. உதாரணத்திற்கு, நீங்கள் அங்கே அமைதியாக உட்கார்ந்து கேட்டுக் கொண்டிருக்கிறீர்கள்; திடீரென யாராவது 'தேள்' என்று சும்மா சொன்னால் போதும், நீங்கள் அரண்டு போய் விடுகிறீர்கள்; அல்லது எலுமிச்சஞ்சாறு என்று யாராவது சொன்னவுடன் உங்கள் நாக்கில் நீர் ஊறுகிறது. நீங்கள் அறுசுவை உணவுகள் நிறைந்த தட்டின் முன்னால் அமர்ந்திருக்கலாம்; யாராவது ஏதாவது அசுத்தமானதை அருவருப்பானதைப் பற்றிப் பேசிவிட்டால், நீங்கள் அந்த உணவை உட்கொள்ள முடிவதில்லை. உலகியலான வார்த்தைகளே மனிதனின் மனதில் இத்தகைய மாற்றத்தை ஏற்படுத்தும் போது, அருளும் பொருளும் செறிந்த வார்த்தைகள் நிச்சயமாக மனிதனின் மனதைத் தூய்மைப்படுத்தவும் திருத்தவும் உதவும். (தெய்வீக அருளுரை, நவம்பர்14, 1976)