பக்தி மார்க்கம் என்பது இப்படிப்பட்டது தான் என வரையறுத்து விவரிக்க முடியாது. இது பல விதங்களாக, பற்பல பாதைகளும் அனுபவ வகைகளும் கூடிய ஒன்றாக இருப்பதால், இதனை எவராலும் துல்லியமாகவும் முழுமையாகவும் அறுதியிட்டு கூற இயலாது. ஒவ்வொரு பக்தரும் அவரவரின் தனிப்பட்ட அனுபவத்தின் மூலம்தான் பேரானந்தம் அடைகிறார்கள். பிற பக்தர்களின் அனுபவங்கள் மூலம் ஒருவர் அதிகபட்சம் ஊக்கம் மட்டும் வழிகாட்டல் பெறலாம். அவ்வளவே. பக்தி என்பது வரையறைக்குட்பட்ட ஜீவாத்மாவை எல்லையற்ற பரமாத்ம ப்ரேமையோடு பிணைக்கக் கூடியதாகும். அப்படிப்பட்ட பக்தி தரும் பரமானந்தம் வர்ணனைக்கு அப்பாற்பட்டது. இதனையே உபநிஷதங்கள் ‘அகண்ட ஏக ரஸம்’ அதாவது, இடையறாத இனிய ரசம் என்று உரைத்தன. அப்படிப்பட்ட அபார பக்தியின் அனுபவத்தைத் தெளிவாக விவரிப்பது என்பது மனித மொழிக்கு சாத்தியமில்லை. புலன்களால் அறியக்கூடிய வெளிப்புற அறிகுறிகளால், ஒரு பக்தன் உயர்ந்த ஆனந்த நிலையில் இருப்பதை ஒருவர் புரிந்து கொள்ள முடியுமே தவிர அந்த மகிழ்ச்சியின் ஆழத்தை யாரால் அளவிட முடியும்? அதற்கும் புலன்களுக்கும் ஒருதுளியும் சம்பந்தமே கிடையாது. மஹான்கள் தங்களின் உதாரணச் செயல்கள் மூலம் உங்களுக்கான பாதையை சிறிது வெளிச்சம் போட்டுக் காட்ட முடியும். மற்றபடி, பக்தி என்பது உங்கள் சொந்த அனுபவத்தில் உணரப்பட வேண்டும். மஹான்களின் துணையுடன், பவித்ரமான பக்தியைப் பற்றி ஏதோ கொஞ்சம் நீங்கள் புரிந்து கொள்ளலாம். ஆனால் அனைத்திற்கும் அப்பாற்பட்ட இறைநிலையை அணுகும்போது அதனை எடுத்துரைப்பதற்கான திறன் வார்த்தைகளுக்கு இல்லை என்பதை எப்போதும் நினைவில் கொள்ளுங்கள். (பிரசாந்தி வாஹினி,அத்தியாயம்-9)