இறைவனின் வழிகள் புதிரானவை. தெய்வத்தின் அருள் எவ்வாறு செயல்படுகிறது என்பதைப் புரிந்துகொள்வது கடினமே. இறைவன் தன் பக்தர்களைத் தகுந்த நேரத்தில் காத்தருளிய தருணங்கள் எண்ணிலடங்காதவை. கபீர் நெசவுத் தொழில் செய்து வந்தார். ஒருநாள் அவர் மிகவும் நோய்வாய்ப்பட்டதால், அவருடைய கடமைகளைச் செய்ய முடியாமல் போனார். கருணாமூர்த்தியான இறைவன், கபீரின் உருவில் வந்து, ஆடையை நெய்து கொடுத்து அவரைக் காத்தருளினான். அதைப் போலவே, கோரா கும்பர் துன்பத்தில் ஆழ்ந்திருந்த போது இறைவன் குயவன் உருவில் வந்து, தானே பானைகளைச் செய்து கொடுத்தருளினான். பாண்டுரங்கனின் பரம பக்தையான சக்குபாய் இறைவனது திருநாமத்தை இடையறாது உச்சரித்துக் கொண்டே இருப்பாள். ஒருநாள் அவளுக்குக் காய்ச்சல் அதிகமாக இருந்ததால் அவளால் அன்றாட வேலைகளைச் செய்ய முடியவில்லை. இப்படிப்பட்ட இக்கட்டான நேரத்திலும் கூட, அவளது கணவரும் மாமியாரும் அவளை ஓய்வு எடுத்துக்கொள்ள அனுமதிக்கவில்லை. அந்தத் தருணத்தில் பாண்டுரங்கன் சக்குபாயியின் உருவத்தை ஏற்று வந்து, அவளது எல்லா வேலைகளையும் தானே செய்தருளினான். இறைவன், எவ்வாறு, எப்போது, எங்கு வந்து தனது பக்தர்களைக் காத்தருள்வான் என்பதைப் புரிந்து கொள்வது மிகக் கடினமே. இறைவன் தோன்றியருள்வதற்கு பரிபூரண நம்பிக்கையே அத்தியாவசியமாகும்! (தெய்வீக அருளுரை, செப்டம்பர்03, 1999)