ஆன்மிகக் கண்ணோட்டம் இல்லாமல் உங்கள் படிப்பு, பட்டங்கள் அனைத்தும் வீணே. அவற்றின் மதிப்பு பூஜ்ஜியம் தான். எனவே, உங்கள் வாழ்க்கையை கடவுள் பக்தியால் நிறைத்து, "நான் இந்த உடல் அல்ல. இது நான் அணிந்திருக்கும் ஒரு உடையே. என்னுள் இருக்கும் இறைவனே என் வாழ்க்கையை நடத்திக் கொண்டிருக்கிறார்" என்ற கண்ணோட்டத்தை வளர்த்துக் கொள்ளுங்கள். நீங்கள் முழுமையாகக் கனிந்த பழங்கள் போன்றவர்கள். ஆனால், பழங்களில் இனிய ரசம் இருக்க வேண்டும். அது இல்லாமல், அது பழமாக இருக்க முடியாது. உங்கள் அனைவரிடமும் ப்ரேமையின் இனிய ரசம் இருக்க வேண்டும். இனிய ரசம் இல்லை என்றால் மக்கள் பழத்தைக் கடித்துப் பார்த்துத் துப்பி விடுவார்கள். எனவே உங்கள் இதயங்களை இனிய ப்ரேமரசத்தால் நிறைத்துக் கொள்ளுங்கள். நாம ரூபம் எதுவானாலும், இறைநம்பிக்கையை வளர்த்துக் கொள்ளுங்கள். இறைவனுக்குப் பல திருநாமங்கள் உண்டு; ஆனால் இறைவன் ஒருவனே. ஆபரணங்கள் பலவாக இருக்கலாம், ஆனால் தங்கம் ஒன்றே. அவற்றுள் தங்கம் இருப்பதை மறந்து விடாதீர்கள். தங்கம் இல்லாமல் உங்களால் ஆபரணங்கள் செய்ய முடியாது. உங்களுக்கு விரும்பிய பலனைத் தருகிறதா இல்லையா என்பதைப் பொருட்படுத்தாமல் இறை நம்பிக்கையை உங்களின் முதன்மையான குணமாக வளர்த்துக் கொள்ளுங்கள். அந்த நம்பிக்கையோடு ப்ரேமையைச் சேர்த்துக் கொள்ளுங்கள். (தெய்வீக அருளுரை, 26 டிசம்பர் 2007)