உங்களிடம் இருக்கக்கூடிய ஆஸ்தி, அந்தஸ்து, அதிகாரம், அறிவாற்றல் முதலியவற்றைக் கண்டு பெருமிதம் கொள்ளாதீர்கள். நீங்கள் அவற்றைக் கொண்டு பிறருக்கு உதவமுடியும் எனும் நம்பிக்கையின் பேரில் அவை அனைத்தும் உங்களுக்குக் கொடுக்கப்பட்டுள்ளதாகக் கருதுங்கள். அவையாவும் இறை அருளின் அடையாளங்கள், சேவைக்கான வாய்ப்புக்கள், பொறுப்புணர்வின் சின்னங்கள். பிறரது குறைகளைக் கண்டு ஒருபோதும் குதூகலிக்காதீர்கள்; பிறருடைய தப்புகளையும் தவறுகளையும் பச்சாதாபத்துடன் கையாளுங்கள். எப்போதும் பிறரில் உள்ள நல்லவற்றையே நாடுங்கள்; அவர்களைப் பற்றிய நல்ல செய்திகளையே கேளுங்கள்; ஒருபோதும் அவதூறுகளை செவி மடுக்காதீர்கள். இந்த தீபாவளித் திருநாளில், நாமஸ்மரணை எனும் தீபத்தை ஏற்றி, உங்களுடைய உதடுகளின் நுனியில் வையுங்கள். அதற்கு பக்தி எனும் எண்ணெயை ஊற்றி, மனஉறுதியை திரியாக வையுங்கள். உங்கள் வாழ்க்கையின் ஒவ்வொரு நிமிடத்தையும் இந்த தீபம் ஒளிரச் செய்யட்டும். இந்தத் திருநாமத்தின் மகிமை, உங்களுடைய புறத்திலும் அகத்திலும் உள்ள இருளை நீக்கிவிடும். உங்களை அணுகும் அனைவரிடமும் நீங்கள் சாந்தி, சந்தோஷங்களைப் பரப்புவீர்கள்! (தெய்வீக அருளுரை, அக்டோபர் 24, 1965)

ஒரு தீபத்திலிருந்து நீங்கள் லட்சக்கணக்கான தீபங்களை ஏற்றலாம்; இருந்தாலும், அது இம்மியளவும் பாதிப்படைவதில்லை! ப்ரேமையும் கூட அப்படிப்பட்டதே. அதை லட்சக்கணக்கானவர்களுடன் பகிர்ந்து கொள்ளுங்கள், அது தனித்து இருந்தபோது இருந்தபடியே தொடர்ந்து பிரகாசித்துக் கொண்டிருக்கும். - பாபா