மனதை ஒரே பார்வை கொண்டதாக மாற்ற வேண்டும். மனிதர்கள் எந்தக் குறிக்கோள் மற்றும் சாதனையைத் தங்கள் முன் வைத்துக் கொண்டுள்ளார்களோ, அதனை அடைவதற்கான தங்களுடைய அனைத்து முயற்சிகளையும் எடுத்து, உறுதியுடன் முன்செல்ல வேண்டும். இவ்வாறு செய்தால், அவர்களுக்கு பின்னடைவு ஏற்படுத்த எந்த சக்தியாலும் முடியாது; அவர்கள் பெற வேண்டிய நிலையை அவர்கள் அடைய முடியும். எல்லாத் திசைகளிலும் பறந்தோடும் மனதை, இறைநாமஸ்மரணையில் ஆழ்த்திவிடுங்கள்; சூரியகிரணங்களை ஒரு பூதக்கண்ணாடியின் மூலம் ஓரிடத்தில் குவிப்பதைப் போன்ற விளைவு ஏற்படும். சிதறிச்செல்லும் கிரணங்கள் சுட்டெரித்துவிடும் ஒரு தீச்சுடரின் சக்தியைப் பெற்று விடுகின்றன. அதைப்போல, புத்தி மற்றும் மனச்சிந்தனைகளின் அலைகளை, ஆத்மா எனும் குவி-லென்ஸின் மூலம் ஒருமுகப்படுத்தினால், அவை ஸர்வ துர்குணங்களையும் த்வம்சம் செய்யும் ஆத்மசக்தியைப் பெற்று, ஸர்வ சந்தோஷங்களின் நிலையமான ஸர்வேஸ்வர ஜோதியாக வெளிப்படும். இவ்வுலகில், வியாபாரம் அல்லது வேலையில் வெற்றி பெறும் ஒவ்வொரு மனிதரும் தத்தம் ஏகாக்ரஹ சித்தத்தின் மூலமே காரியங்களை சாதிக்க முடிகிறது. எந்த ஒரு சின்னக்காரியமும் கூட ஏகாக்ரஹ சித்தமின்றி நடைபெறுவதில்லை. எவ்வளவு கடினமான பிரச்சனையும் கூட நிச்சலமான ப்ரயத்தனத்தின் மூலம் சாத்தியமாகிறது. (தியான வாஹினி, அத்தியாயம்-1)