சூரியன் வடதிசையை நோக்கி மேற்கொள்ளும் பயணம் (உத்தராயணம்) கடவுளை உணர மனிதன் செல்லவேண்டிய பாதையைச் சுட்டிக்காட்டுகிறது. சூரியனே, தன்னலமற்ற, அயராத சேவையின் உன்னதமான உதாரணம். சூரியன் இன்றி உலகம் இயங்க முடியாது. சூரியன் இருப்பதால் மட்டுமே பூமியில் வாழ்வது சாத்தியமாகிறது. தற்பெருமை ஏதுமின்றி பணிவான பக்தி சிரத்தையுடன் கடமை ஆற்றுவதற்கான பாடத்தை மனிதனுக்கு சூரியன் கற்றுக் கொடுக்கிறது. ஒருவர் தன் கடமையை பக்தியுடனும் அர்ப்பணிப்புடனும் செய்ய வேண்டும் என்பதற்கு சூரியனே அனைவருக்கும் தலைசிறந்த எடுத்துக்காட்டாகத் திகழ்கிறது. கிருஷ்ணர் கீதையில் சுட்டிக்காட்டியபடி, ஒருவர் தன் கடமையைச் செய்வதே மிகப்பெரிய யோகமாகும். உங்கள் செயல்களும் சிந்தனைகளும் நல்லவையாக இருக்கட்டும். நீங்கள் பின்னர் தெய்வீக பேரானந்தத்தை அனுபவிப்பீர்கள். சங்கராந்தி பண்டிகை மனிதனின் மனப்பான்மையில் பல்வேறு மாற்றங்களைக் கொண்டு வருவதை நோக்கமாகக் கொண்டதாகும்; இதனால் ஒருவர் தனது வாழ்க்கையை புனிதப்படுத்திக் கொள்ளலாம். இந்தப் பண்டிகை பாரதீயர்களுக்கு மட்டுமே உரித்தான ஒன்றல்ல. அதன் செய்தியில் உலகில் உள்ள அனைவருக்கும் ஏற்ற பொருள் இருக்கிறது. இது அனைத்து தட்பவெப்பநிலைகளிலும், நாடுகளிலும் உள்ள எல்லா மதங்களைச் சார்ந்த மக்களுக்கும் ஒரு செய்தியைக் கொண்டதாகும். (தெய்வீக அருளுரை, ஜனவரி 15, 1992)