உங்கள் பிரச்சனைகள் பெரும்பாலும் உங்களாலேயே உருவாக்கப்பட்டவை. நீங்கள் இறைவனிடம் திடநம்பிக்கையை வளர்த்துக்கொண்டு, அவனது சங்கல்பத்திற்குப் பணிந்துவிட்டால், அவன் உங்களைக் காக்கத் தவறுவதில்லை. இதுவே சரணாகதி தத்துவமாகும். இறைவனிடம் இவ்வாறு சரணடைவதால் கிடைக்கும் பேரானந்தத்தை வேறெந்த வகையிலும் பெற முடியாது. உங்களுக்கு என்ன நடந்தாலும் அது உங்கள் நன்மைக்காகவே என்று கருதுங்கள். இடர்கள் மற்றும் இன்னல்களிலிருந்து பெறக்கூடிய பேரானந்தத்தைக் கண்டறியுங்கள். பாண்டவர்களின் பன்னிரண்டாண்டு வனவாசத்தின்போதுதான் அவர்களுடைய பக்தி மிக உயர்ந்த நிலைக்கு வளர்ந்தது. சுக சந்தோஷங்களின் சங்கிலித் தொடர் போல வாழ்க்கை இருக்கவேண்டும் என்று எதிர்பார்ப்பது உண்மையான பக்தியின் அடையாளம் அல்ல. அதுதான் உண்மையான சந்தோஷமா? தியாகராஜர், சுகம் என்பது நிதியில் இருக்கிறதா அல்லது இறைவனின் ஸந்நிதி சேவையில் இருக்கிறதா என்று கேட்டார். அவர், செல்வத்தைக் குவிப்பதில் எந்த சந்தோஷத்தையும் காணவில்லை. இறைவன் அங்கிங்கெனாதபடி எங்கும் நீக்கமற நிறைந்திருப்பதை உணர்வதில் தான் அவர் பேரானந்தத்தை அனுபவித்தார். அதைப் போலவே, பக்தர்கள் அனைவரும் இறைவன் எல்லாவற்றிலும் நிறைந்திருப்பதை உணர்ந்து, தங்கள் அன்றாட கடமைகளை தெய்வார்ப்பணமாக செய்ய வேண்டும்! (தெய்வீக அருளுரை, ஜூலை 14, 1984)

நீங்கள் எந்த அளவுக்கு இறைவனுக்கு நெருக்கமாக இருக்கிறீர்களோ, அந்த அளவுக்கு இறைவனும் உங்களுக்கு நெருக்கமாக இருக்கிறான். இந்த உண்மையை நீங்கள் புரிந்து கொண்டால், பின்னர் இறைவன் எங்கும் இருக்கிறான் என்பதை நீங்கள் உணர்வீர்கள். - பாபா