உறக்கத்திலிருந்து எழுவதே பிறப்பு அன்றி வேறில்லை என்பதையும், உறங்கச் செல்வதே இறப்பு என்பதையும் அறிந்திருங்கள். ஒவ்வொரு நாளும் காலையில் எழுந்தவுடன், "இறைவா! நான் இப்போது உறக்கம் எனும் கருப்பையிலிருந்து பிறந்திருக்கிறேன். உன்னை என் மனக்கண் முன் எப்போதும் இருக்குமாறு செய்து, அனைத்து கடமைகளையும் இன்று உனக்கு அர்ப்பணமாக ஆற்ற உறுதி பூண்டுள்ளேன். என்னுடைய சிந்தனைகள், சொற்கள் மற்றும் செயல்களை புனிதமானவையாகவும், பரிசுத்தமானவையாகவும் ஆக்குவாயாக. நான் யாருக்கும் துன்பம் விளைவிக்காமல் இருக்க வேண்டும்; எவரும் எனக்கு துன்பம் விளைவிக்காமல் இருக்கட்டும். இன்று என்னை வழிகாட்டி நடத்திச் செல்க" என்று பிரார்த்தனை செய்யுங்கள். நீங்கள் இரவில் உறங்கச் செல்லும்போது, “இறைவா! இன்று காலை நான் உன் மீது பாரமாக போட்ட இன்றைய பணிகள் அனைத்தும் முடிந்துவிட்டன. என்னைச் சிந்திக்க, பேச, நடக்க மற்றும் செய்ய வைத்தவன் நீயே. எனவே, என் அனைத்து சிந்தனைகள், சொற்கள் மற்றும் செயல்களை உன் திருப்பாதத்தில் சமர்ப்பிக்கிறேன். என் பணி முடிந்து விட்டது. நான் உன்னிடம் திரும்பி வருகிறேன், என்னை ஏற்றுக்கொள்” என்று பிரார்த்தனை செய்யுங்கள். இவற்றை உங்களுடைய அன்றாடப் பிரார்த்தனைகளாக ஏற்றுக் கொள்ளுங்கள். இந்த பிரார்த்தனை மனப்பாங்கு உங்கள் உந்துதல்களை பண்படுத்தி, மெய்யறிவு முழுமையாக வெளிப்படச்செய்யும். (தெய்வீக அருளுரை, ஜூலை 27, 1961)