மோக்ஷம் என்பது வாழ்க்கை முடிந்த பின் அடைய வேண்டியது ஒன்றல்ல. மோக்ஷத்திற்கான முனைப்பு வாழ்க்கையின் ஆரம்பத்திலேயே தொடங்கப்பட்டு தொடர்ந்து செயல்படுத்தப்பட வேண்டும். மோக்ஷம் என்பதற்கு மற்றொரு சொல், ‘விடுதலை' (emancipation). புலன்களின் பந்தங்களில் இருந்து விடுதலை பெறுவதே உண்மையான சுதந்திரமாகும். அதாவது நீங்கள் எல்லா கடமைகளையும் பலன் கருதாது பற்றில்லாது செய்யவேண்டும் என்பதே இதன் பொருள். இன்றோ எல்லா செயல்களும் முடிவில் கிடைக்கும் பலன்களுக்காகவே செய்யப்படுகின்றன. உதாரணமாக மாணவர்கள் உயிரியல் பாடத்தை மருத்துவராக வேண்டும் என்ற நோக்கத்திற்காக படிக்கின்றார்கள். இதில் தவறு ஏதும் இல்லை தான். ஆனால் அவர்கள் மருத்துவர்கள் ஆன பின், தங்களுடைய நோயாளிகளின் நலன்களைப் பற்றி முதன்மையாக அக்கறை காட்ட வேண்டுமே அன்றி, தங்களுடைய வருமானத்தைப் பற்றி அல்ல! சமூக சேவை செய்யும் போது கூட, பெரும்பாலும் சுயநலம் கலந்திருப்பதால் உங்கள் சேவையின் தரம் கெடுகிறது. சுயநலமற்ற தூய அன்பால் செய்யப்படும் சேவையானது ஒரு நேர்மறையான செயல் என்பதற்கு மாறாக, சுயநலத்தால் அது கறைபடிந்த எதிர்மறை செயலாக ஆகிவிடுகிறது. இத்தகைய எதிர்மறையான செயல்களிலிருந்து, நிரந்தரமான சந்தோஷத்தைப் பெற முடியாது. (தெய்வீக அருளுரை பிப்ரவரி 15, 1998)