நற்குண சீலம் தரும் ஆனந்தத்தின் அளவிற்கு, செல்வம், புகழ், பொருளாற்றல், அறிவாற்றல் ஆகியவற்றால் தர இயலாது. மிக உயர்ந்த நற்குண சீலம் – பணிவு, இறைவனை சரணடைவதாகும். கவனித்துக் கொள்ள யாரும் இல்லாதவர்களை ‘அநாதைகள்’ என்று மக்கள் கூறுகிறார்கள்; ஆனால், இறைவன் ஒவ்வொருவரையும் கவனித்துக் கொள்கிறான். எனவே, யாருமே ஒரு அநாதையாக இருக்க முடியாது. இறைவன் மட்டுமே "அநாதை" (அநாதை என்றால் ‘தனக்கொரு தலைவன் இல்லாதவன்’ என்றும் ஒரு பொருளுண்டு), ஏனெனில், தான் இறைவனின் பாதுகாவலன் என்று யாரால் கூறிக்கொள்ள முடியும்? உங்கள் சிந்தனை, சொல் மற்றும் செயல் ஆகியவற்றை இறைவனுக்கு அர்ப்பணித்து விடுங்கள். உங்களுடைய சில பணிகள் இறைவனுக்காகச் செய்தவை, மற்றவை உங்களுக்காகச் செய்தவை என்று கருத வேண்டாம். அவை இரண்டுமே ஒரு தானியத்தின் இரு பாதிகளைப் போன்றவை. இவ்விரு பாதிகளிலுமிருந்து போஷாக்கைப் பெற்றே தானியத்திலிருந்து செடி முளைக்கிறது. விழிப்புள்ளவை - ஜடமானவை, உயிருள்ளவை - உயிரற்றவை, அசைபவை – அசையாதவை, இவை அனைத்தும் இறைவனே. இந்த நம்பிக்கையை வலுப்படுத்திக் கொண்டு, இந்த நம்பிக்கையில் வாழுங்கள். இதுவே இடையறாத ப்ரம்மானந்தத்திற்கான அருமருந்தாகும். (தெய்வீக அருளுரை, நவம்பர் 23, 1983)