பரப்ரம்மத்தைத் தெரிந்து கொள்ள விழைவோருக்கான மூன்றாவது தகுதி - (விவேகம் மற்றும் வைராக்கியத்தைத் தவிர), ஆறு நற்குணங்களான மனக்கட்டுப்பாடு, உடல் மற்றும் புலனடக்கம், புலன்களை ஈர்க்கும் பொருட்களிலிருந்து விலகி இருத்தல், சகிப்புத்தன்மை, உறுதியான நம்பிக்கை, மற்றும் சமச்சீரான மனப்பாங்கு (ஸமா, தமா, உபரதி, திதிக்ஷை, சிரத்தை மற்றும் ஸமாதானம்) ஆகியவையே. மனக்கட்டுப்பாடு (ஸமா) - இதைப் பெறுவது மிகவும் கடினம். மனம் பந்தத்தை ஏற்படுத்தும், ஆனால் அதுவே மோக்ஷத்தையும் அளிக்கவல்லது. அது ரஜோ மற்றும் தமோ குணங்களின் கலவை. அது எளிதாக மாசடையக் கூடியது. மனமானது, பொருட்களின் உண்மை நிலையை மறைப்பதில் இன்புற்று, அவற்றின் மீது தான் விரும்பும் ரூபங்கள் மற்றும் பண்புகளை அமைத்து விடக்கூடியது. எனவே மனதின் செயல்பாடுகள் கட்டுப்படுத்தப்பட வேண்டும். மனதிற்கு இரண்டு பண்புகள் உண்டு. முதலில், அது புலன்களின் பின்னால் தலைதெறிக்க ஓடுகின்றது. மனம் எந்தப் புலனைப் பின்பற்றினாலும், அது அழிவையே தேடிக் கொள்கிறது. ஒரு பானையில் உள்ள தண்ணீர் காலியாகி விட்டால், அது பத்து ஓட்டைகளின் வழியாகக் கசிந்துவிட்டது என நாம் ஊகிக்கத் தேவையில்லை; அதைக் காலியாக்க ஒரு ஓட்டையே போதும். அதைப் போலவே, ஒரே ஒரு புலன் கட்டுப்பாட்டில் இல்லாவிட்டாலும் கூட, ஒருவர் பந்தத்தில் பிணைக்கப்பட்டு விடுகிறார். எனவே, மனக்கட்டுப்பாட்டைப் பெறுவதற்கு ஒவ்வொரு புலனும் அடக்கப்பட வேண்டும். (சூத்ர வாஹினி, அத்தியாயம்-1)