ஏதோ ஒரு பலன் அல்லது லாபத்திற்காக இறைவனைப் பிரார்த்திக்கக் கூடாது. ஏனெனில், அவனை வேண்டும் வரை இறைவன் காத்திருக்கிறான் என்று அர்த்தமாகி விடும்! அவனிடம் சரணடைந்து விடுங்கள்; அவன், என்ன மிகச் சிறந்தது எனக் கருதுகிறானோ அவ்வாறே உங்களைக் கையாளுவான், அதுவே உங்களுக்கு மிகச் சிறந்ததாகும். இறைவன், தான் பெறும் புகழ்ச்சியின் விகிதத்திற்கு ஏற்ப அருளைப் பொழிவதில்லை! நீங்கள் இறைவனிடம் ஏதோ ஒன்றுக்காகப் பிரார்த்திக்கும் போது, ஏதோ காரணத்திற்காக நீங்கள் வேண்டும் விதத்திலோ அல்லது நீங்கள் விரும்பும்படி விரைவாகவோ அந்த பிரார்த்தனை நிறைவேறாமல் போனால், நீங்கள் இறைவனைப் பழிக்கும் அபாயத்திற்கு உள்ளாகலாம்! இறைவன், ஏதோ சொர்க்கத்தில் அல்லது புனித இடத்தில், உங்களிடமிருந்து வெகு தொலைவில் தங்கி இருக்கும் ஒரு அந்நியர் என்று நீங்கள் கருதுவதால் இந்தப் பிரச்சனை எழுகிறது. இறைவன் உங்களுள், உங்களது ஒவ்வொரு சொல், செயல் மற்றும் சிந்தனையில் இருக்கிறான். அவனுக்குப் பொருத்தமானதாக இருக்குமாறு சொல்லுங்கள், செய்யுங்கள், சிந்தியுங்கள். உங்களது முழு திறனையும் பயன்படுத்தி, உங்களது மனச்சாட்சியின் திருப்திக்கு ஏற்றவாறு, அவன் உங்களுக்கு அளித்துள்ள கடமையை ஆற்றுங்கள். அதுவே மிகச் சிறந்த பயனளிக்கும் பூஜையாகும்.