மனிதன் தான் அனைத்தையும் அறிந்தவன் என்று பெருமை அடித்துக் கொள்கிறான்; ஆனால், அவனைப் பற்றியே கேட்டால், அவன் அவமானத்தால் தலை குனிந்து கொள்கிறான்.மனிதன் ஒவ்வொரு நாட்டின் செய்தியையும் அறிந்திருக்கிறான்; ஆனால் அவன் தனக்கும், பிறருக்கும் தான் எவ்வளவு தொந்தரவாக இருக்கிறான் என்பதை அறியாதவனாக இருக்கிறான்.அவன் இருட்டில் உழண்டு கொண்டு ஆனந்தத்திற்காக ஏங்குகிறான்.பிரார்த்தனை, தன்னலமற்ற சேவை, ஆன்மிக நூல்களைப் படித்தல்,தியானம் மற்றும் மௌனத்தின் மூலம் ஆனந்தத்தை எப்படிப் பெறுவது என்பதை அறியாதவனாக இருக்கிறான். தானே ஆனந்தம் மற்றும் அவனது சொந்த இயல்பே ஆனந்தம் என்பதில் அவனுக்கு நம்பிக்கை இல்லை. அவன் பேரழிவால் அடித்துச் செல்லப்படுகிறான்; ஏனென்றால், அந்த அடியைத் தாங்க அவனுக்கு வலிமை இல்லை. விதியின் இடிகளுக்கு எதிரான மிகவும் வலிவான கவசம் உள்ளுறையும் இறைவன் பால் கொள்ளும் நம்பிக்கையே. கடின உழைப்பின் மூலம் பறவைகளால் கட்டுப் படும் கூடுகள் புயலால் சிதறி அடிக்கப் பட்டு விடுகின்றன; நறுமண மலர்களின் இதழ்கள் மழையால் வீழ்த்தப்படுகின்றன. தோல்வியும், வெற்றியும் ஒரே நாணயத்தின் முன் பக்கமும், பின் பக்கமுமே! நீங்கள் ஒன்றை வரவேற்கும் போது, கண்டிப்பாக மற்றதையும் வரவேற்கத் தயாராக இருக்க வேண்டும்! சகிப்புத் தன்மை, கருணை மற்றும் களங்கப் படுத்த முடியாத நல்லொழுக்கமுமே, ஒரு சந்தோஷமான வாழ்க்கையின் மூன்று தூண்களாகும்.