இன்று நாம் அகண்ட பஜனை செய்கிறோம் (உலகனைத்திலும் உள்ள சாய் பக்தர்களால் செய்யப்படும் 24 மணி நேர பஜனை). இது ஒரு தனி மனிதருக்காகவோ, ஒரு நாட்டிற்காகவோ அல்லது ஒரு சமூகத்திற்காகவோ செய்யப்படுவதல்ல. இது மனித குலம் அனைத்தின் நலனுக்காகவே. பாடப்படும் பஜனைகள், ஒலி அலைகளாக, வளி மண்டலத்தை ஊடுருவி, சுற்றுப்புறம் அனைத்தையும் நிரப்புகின்றன. அதனால், சுற்றுப்புறம் அனைத்தும் பரிசுத்தமாக்கப் படுகிறது. இந்த பரிசுத்தமான சூழ்நிலையில் சுவாசிப்பதால், நமது இதயங்கள் புனிதமடைகின்றன. இறைவனது திருநாமஸ்மரணை ஒரு கொடுக்கல், வாங்கல் முறையாகும். இறைவனது திருநாமத்தை பாடுவது, சந்தோஷம் மற்றும் புனிதத்துவத்தைப் பரஸ்பரம் பகிர்ந்து கொள்ளும் ஒரு பயிற்சியாக ஆக வேண்டும். நாம் உருவாக்கும் ஒலிகள் சுற்றுப்புறத்தில் எதிரொலிக்கின்றன என்பதை நினைவில் கொள்ள வேண்டும். அவை வளி மண்டலத்தில் ஒலி அலைகளாக நிரந்தரமாகத் தங்கி, அந்த ஒலிகளை எழுப்பும் மனிதருக்குப் பிறகும் கூட நிலைத்திருக்கும். இன்று, சுற்றுப்புறம் புனிதமற்ற மற்றும் கொடூரமான ஒலிகளால் மாசடைந்திருக்கிறது. இவை தீய செயல்களுக்கு இட்டுச் செல்லும், தீய சிந்தனைகள் மற்றும் உணர்வுகளை வளர்க்கின்றன. சுற்றுப்புறம் தூய்மையாக்க வேண்டும் என்றால், அது பரிசுத்தமான மற்றும் புனிதமான ஒலிகளால் நிரப்பப்பட வேண்டும்.