மனிதன், அவனது அந்தஸ்து மற்றும் நிலைமையை உயர்த்திக் கொள்ள, பல வழிகளில் இடையறாது பாடுபடுகிறான்.அவன் ஒன்றில் வெற்றி பெற்றவுடன், வேறு ஒன்றில் வெற்றியை நாடுகிறான்; இப்படிப் போய்க் கொண்டே இருக்கிறது. ஆனால், ஒரு உண்மையான மனிதனின் அடையாளச் சின்னம் என்ன? மனித வாழ்க்கை லாபங்கள் மற்றும் நஷ்டங்கள், ஏற்றங்கள் மற்றும் தாழ்வுகளால் பிணைக்கப் பட்டுள்ளது.ஒருவர் அவற்றை எதிர் கொண்டே ஆக வேண்டும். இந்த சவால்களை சகிப்புத் தன்மையுடன் சமாளிப்பவர் மட்டுமே ஒரு உண்மையான மனிதர். வாழ்வின் ஏற்றத் தாழ்வுகளுக்குக் காரணம் என்ன? இதற்கான காரணத்தை ஒருவரது ஆசைகளில் காணலாம். ஆசைகள் தவிர்க்க முடியாதவை என்பது சந்தேகத்திற்கு இடமில்லாததே. உதாரணமாக, ஒருவர் சில இலட்சியங்களை அடைவதை நாடலாம். மற்றவர், கல்வியில் நன்கு தேர்ந்து, ஒரு நல்ல வேலையைப் பெறுவதை நாடலாம். மேலும் ஒருவர் நல்ல பெயரை எடுத்து, ஒரு நல்ல குடும்பத்தை உருவாக்குவதை விரும்பலாம். இப்படிப் பட்ட ஆசைகளில் எந்தத் தவறும் இல்லை. ஆனால், இந்தக் கலி யுகத்தில் நாம் காண்பது அளவற்ற ஆசைகளே. இதன் பலனாக, மனிதர்கள் தவறான பாதைகளில் வீழ்ந்து விடுகிறார்கள்.ஒவ்வொரு ஆசைக்கும் ஒரு வரம்பு இருக்க வேண்டும். அதிகாரம் மற்றும் பதவியைத் தேடுவதிலும் கூட ஒரு அளவு இருக்க வேண்டும்.