நீங்கள் ஒரு இடத்திலிருந்து மற்றொரு இடத்திற்குத் தபால் பார்சல்களைப் போல, உங்களது அந்தராத்மாவில் அல்லாது, வெளி உறையில் முத்திரைகளைப் பதித்துக் கொண்டு செல்கிறீர்கள். ஒரு பார்வையற்ற மனிதன் பல்வேறு இடங்களுக்குச் செல்லும்போது, அது பகலா அல்லது இரவா என்று கவலைப் படுவதில்லை. அதைப் போலவே, நீங்கள் ஒரு இடத்திலிருந்து, மற்றொரு இடத்தைப் பாகுபடுத்திப் பார்ப்பதில்லை. நீங்கள் எல்லாவிதமான இடங்களிலும் ஒரே மாதிரியாக, எந்தக் கவலையும் இன்றி, ஒரே மாதிரி புலன்களில் கவனம் கொண்டவராக நடந்து கொள்கிறீர்கள். தீர்த்த யாத்திரைகளின் பலனாக, உங்களது பழக்கங்கள் திருந்த வேண்டும், உங்களது கண்ணோட்டம் விசாலமாக ஆக வேண்டும், உங்களது அகப்பார்வை தீர்க்கமானதாகவும், மேலும் நிலையானதாகவும் ஆக வேண்டும். நீங்கள், இறைவன் அங்கிங்கெனாதபடி எங்கும் நிறைந்திருப்பதையும், மனித குலத்தின் ஒருமையையும் உணர வேண்டும். நீங்கள் சகிப்புத் தன்மை மற்றும் பொறுமை, தானம் மற்றும் சேவை ஆகியவற்றைக் கற்றுக் கொள்ள வேண்டும். புனிதத்தல யாத்திரை முடிந்த பின், நீங்கள் உங்களது சொந்த இல்லத்தில் அமர்ந்து, உங்களது அனுபவங்களைச் சிந்தித்துப் பார்த்து, இறைவனை உணர்தலுக்கான உயர்ந்த, வளமான, மேலும் உண்மையான அனுபவத்தை நாடுவது என உறுதி எடுத்துக் கொள்ள வேண்டும். நீங்களும் அத்தகைய உறுதி எடுத்துக கொண்டு, படிப்படியாக அந்தக் குறிக்கோளை அடைய வேண்டும் என நான் ஆசீர்வதிக்கிறேன்.