நிலையான ஞானம் கொண்ட ஒரு மனிதனின் உண்மையான குணாதிசியங்கள் என்ன எனக் கூறுமாறு பகவான் ஸ்ரீகிருஷ்ணரை, அர்ஜூனன் வேண்டிய போது, அவர், ‘’ பார்த்தா! இப்படிப் பட்ட ஒரு மனிதன் எந்த விதமான ஆசையும் இன்றி, ஆத்மாவைப் பற்றிய ஞானம் மற்றும் விழிப்புணர்வு ஒன்றில் மட்டுமே நிலைத்திருப்பான் ‘’ என்று கூறினார். இப்போது, இதில் இரண்டு செயல்முறைகள் உள்ளன: மனதில் ஆசையின் அனைத்து தூண்டுதல்களையும் கைவிடுவது எதிர்மறை செயல்முறை; அதில் எப்போதும் இருக்கும் ஆனந்தத்தைப் பதிப்பது நேர்மறையான அம்சமாகும். மனதிலிருந்து தவறு மற்றும் தீங்கின் அனைத்து நாற்றுகளையும் களைந்தெறிவதே எதிர்மறை செயல் முறையாகும்; இவ்வாறு பண்படுத்தப் பட்ட நிலத்தில் இறைவன் பால் பற்றுதல் என்ற பயிரை வளர்ப்பது நேர்மறைச் செயல் முறையாகும்! களைகளை எடுப்பது எதிர்மறை நிலை; உங்களுக்குத் தேவையான பயிரை வளர்ப்பது என்பது நேர்மறை நிலை. களைகள் என்பது புறநிலை உலகத்திலிருந்து புலன்கள் பெறும் இன்பங்கள்; பயிர் என்பது இறைவனுடனான இணைப்பு. மனம் ஆசைகளின் ஒரு மூட்டை; இந்த ஆசைகளை அவற்றின் வேரோடு பிடுங்கி எறியாவிட்டால்,ஆன்மிக முன்னேற்றத்தின் மிகப் பெரிய தடையாக இருக்கும் மனதை அழிப்பதற்கான வாய்ப்பே இல்லை.