மக்கள், மனிதகுல ( மானவ சேவா) சேவையே, இறைவனுக்கு ஆற்றும் சேவை ( மாதவ சேவா) என்கிறார்கள். அது ஒரு உண்மையான கூற்றே. ஆனால், மக்களின் தெய்வீகத்தில் நம்பிக்கை இன்றியும், பெயர், புகழ் மற்றும் ஒருவரது செயலின் பலனின் மீது ஒரு கண் வைத்துக் கொண்டும் சேவை செய்யப் பட்டால், அந்த கோஷத்தை வெறுமனே திரும்பத் திரும்பக் கூறுவதால் எந்தப் பயனும் இல்லை. ஒருவர் ஆற்றும் செயல் எதுவானாலும், ஒருவர் இறை தியானத்தை இடையறாது ஒரு நண்பனாகக் கொண்டும், மக்களின் இன்றியமையாத இறைத் தன்மையில் நம்பிக்கை கொண்டும் இருந்தால், பின்னர் இந்த வார்த்தை நியாமானதாக இருக்கும். இறைச் சிந்தனைகள் இன்றி, இறைவனுக்கு சேவை ஆற்றுவது என்பது எங்கிருந்து உருவாகும்? இப்படிப் பட்ட அனைத்து பேச்சும் ஒரு நாடகமே. இதை நான் ஏற்றுக் கொள்ள முடியாது.இதற்கு பதிலாக, இறைவனை மனதில் கொண்டு , சத்தியத்தின் பாதையில், தார்மீக அம்சங்களுக்கு ஏற்ப செய்யப் படும் எதுவானாலும்,அதை இறைவனுக்கு ஆற்றப் படும் தன்னலமற்ற சேவை எனக் கருதலாம். உண்மையில், இடையறாது இறைத் தியானத்தில் ஆழ்ந்திருக்கும் எவரும், வேறு எந்தப் பணியையும் செய்யத் தேவை இல்லை. அவர்களது பிரார்த்தனையின் பலனே உலகைப் புனிதமாக்கி விடும். ஆனால், அனைவரும் இவ்வாறு ஈடுபட முடியாது என்பதால், அந்த நிலையை அடைவதற்காக, மனதைப் பரிசுத்தப் படுத்துவதற்கும், ஆசைகளைக் குறைத்துக் கொள்வதற்கும் முயலுங்கள்.