இறைவனது அவதாரம் நிகழ்வதற்குக் கூட, ஆன்றோர்கள் மற்றும் ஒழுக்க சீலர்களின் பிரார்த்தனைகள் ஒரு வரவேற்பு மடலாக செயல்படுகின்றன. புற உலகில், சாதாரண மக்கள் சௌகரியங்கள் தேவைப்படும்போது, அதிகாரிகளை அணுகி, அவர்களை வேண்டுகிறார்கள். அதைப் போலவே, அக உலகில், பக்தி, தானம், சாந்தி மற்றும் சத்யம் ஆகியவற்றை வென்று பெறுவதற்கான வாய்ப்பு இல்லாத போது, இவை வளர வேண்டும் என விழையும், ஆன்றோர்களும், சான்றோர்களும், இறைவனிடம் பிரார்த்தனை செய்கின்றனர். பின்னர், அவர்களது பிரார்த்தனைக்கு இணங்கி, இறைவன் தானே வந்து அவனது அருளைப் பொழிகிறான். இந்த உண்மை அனைவரும் அறிந்ததே. பலர் ஸ்ரீமத் ராமாயணம் மற்றும் ஸ்ரீமத் பாகவதத்தில் படித்திருப்பார்கள் – ஸ்ரீராமரும், ஸ்ரீ கிருஷ்ணரும், முனிவர்களின் பிரார்த்தனைகளின் காரணமாக அவதாரம் எடுத்து வந்தனர் இல்லையா? தெய்வீகப் பிறவியான ஸ்ரீ ராம கிருஷ்ண பரமஹம்ஸர் கூட, காளி மாதாவிடம், அநீதி மற்றும் சுயநலத்தை வேரோடு களைய வல்ல தர்மத்தை உலகனைத்திற்கும் போதிக்க வல்ல ஒருவரை அனுப்புமாறு பிரார்த்தித்தார். எனவே, அவை உடனடியாக பலன் அளிக்காவிட்டாலும் கூட, அவநம்பிக்கை அடைந்து கைவிட்டு விடாமல், இந்தப் பணியை முடிப்பதற்கான பிரார்த்தனைகளை மறுபடியும், மறுபடியும் செய்ய வேண்டும்.