புத்தர், ஒரு முறை, அவரை ஏசத் தொடங்கியவர்களுக்கு ஒரு முக்கியமான பாடம் புகட்டினார்.அவர்களில் ஒருவரிடம் அவர், ‘குழந்தாய் ! ஒரு பிச்சைக்காரர் உங்கள் வீட்டிற்குப் பிச்சை கேட்டு வருகிறார்.நீங்கள் ஏதோ கொஞ்சம் உணவைக் கொண்டு வருகிறீர்கள். அப்போது, அந்த பிச்சைக்காரர், ‘’ நான் கேட்ட பிச்சை இதுவல்ல; நான் இதை ஏற்க மாட்டேன்’’ என்று சொன்னால், நீங்கள் என்ன செய்வீர்கள்? ‘’ என்று கேட்டார். அந்த மனிதர் அதற்கு,’’ நான் கொடுக்க வந்ததை திருப்பி எடுத்துக் கொள்வேன்’’ என்று சொன்னார். புத்தர், ‘’ அதே போல, நீங்களும் உங்களது ஏச்சுகளை எனக்கு பிச்சையாகப் போட வந்தீர்கள். அதை நான் ஏற்கவில்லை. அது இப்போது யாரைச் சேர்ந்தது? அது உங்களுடனேயே இருந்து விடும். எனவே, நீங்கள் உங்களையே தான் ஏசிக் கொண்டீர்கள் ; என்னை அல்ல ‘’ என்றார். ஒரு பதிவு செய்யப் பட்ட தபால் அது அனுப்பட்ட நபர் அதை ஏற்கவில்லை என்றால், தபால் பிரிவு, அதை அனுப்பியவருக்கே திருப்பி அனுப்பி விடும். அதைப் போல, நீங்கள் யாரையாவது விமரிச்சித்தாலோ அல்லது வெறுத்தாலோ, அந்த மனிதர் அதனால் பாதிக்கப்படாமலும், கலங்காமலும் இருந்தால், உங்களது விமரிசனமும், வெறுப்பும் உங்களுக்கே திரும்பி வந்து விடும். பொறாமையும், வெறுப்பும், அவை யார் மீது வெளிப்படுத்தப் படுகிறதோ அவர்களை விட, அந்த உணர்வுகளைக் கொண்டவர்களுக்குத் தான் அதிகத் தீமையை விளைவிக்கும்.