ப்ரேமையின் திருவுருவங்களே! நீங்கள் இறைவனைத் தேடி அலைய வேண்டியதில்லை; அவன் உங்களைத் தேடி வருவான். இறைவன், கோவில்கள், மசூதிகள் அல்லது கிருஸ்துவ தேவாலயங்களில் வசிப்பதில்லை. இவை எல்லாம் மனிதன் கட்டிய அமைப்புக்கள். இறைவன் தனக்கென்று தானே கட்டிய ஒரு கோவிலான மனித உடலில் தான் வசிக்கிறான். மனித உடலே, ஒரு வாழும், ஒரு நடக்கும், ஒரு பேசும் கோவிலாகும். மனிதனால் கட்டப்பட்ட எந்த வழிபாட்டுத் தலமும், இறைவனால் படைக்கப் பட்ட இந்த கோவிலின் சக்தி மற்றும் புனிதத்துவத்திற்கு இணையாக முடியாது. இந்தக் கோவில் செங்கல் மற்றும் சுண்ணாம்பால் கட்டப் பட்டதல்ல.எந்தக் கட்டிடக் கலைஞரும் இதை வடிவமைக்கவில்லை; எந்த பொறியியல் வல்லுநரும் இதைக் கட்டவும் இல்லை. இந்தக் கோவில் இறைவனது ஸங்கல்பத்தினால் உருவானது. நீங்கள் உங்களது உடலை, இறைவனது ஒரு அரிய பரிசாகக் கருதி, இந்தப் புனிதப் பரிசைப் பாதுகாக்க வேண்டும். இறைவனது ஆணைக்கு அடிபணிந்து, புனிதமான செயல்களில் மட்டுமே ஈடுபடுங்கள். தன்னலமற்ற ப்ரேமையை அபிவிருத்தி செய்து கொண்டு, உங்களால் முடிந்த வரை அதைப் பகிர்ந்து கொள்ளுங்கள்; பின்னர் நீங்கள், ஆத்ம தத்துவத்தின் இனிய நறுமணத்தை அனுபவிப்பீர்கள்.