“சிவ” என்றால் மங்களம் என்று பொருள். ‘’ராத்திரி ‘’ இரவைக் குறிக்கிறது. சிவராத்திரி, இருளிலும் பொதிந்திருக்கும் மங்களத்தை விவரிக்கிறது. அஞ்ஞானத்தின் நடுவிலும் இருக்கும் ஞானத்தை அது குறிக்கிறது. அஞ்ஞானமும், ஞானமும் இரண்டு வேறுபட்ட விஷயங்கள் அல்ல; அவை, ஒரே அடிப்படைத் தத்துவத்தின் இரண்டு எதிர் துருவங்களே. ஞானம் மற்றும் அஞ்ஞானம் என்ற இரண்டிற்கும் அப்பாற்பட்ட நிலையே, பிறப்பு மற்றும் இறப்பு நிகழாத பரதத்துவம் எனப்படும் நிலையாகும் ! இவ்வாறு சிவராத்திரி, உங்களுள் உறையும் அதே தெய்வீகமே எங்கும் நிறைந்துள்ளது என்ற உண்மையை, உங்களுக்கு நினைவூட்டுகிறது. சில மனிதர்கள், இறைவன் கைலாசத்தில் வசிக்கிறார் என நம்புகிறார்கள். கைலாசம் எங்கு இருக்கிறது? கைலாசம் என்பது உங்களது சொந்த சந்தோஷம் மற்றும் ஆனந்தமே. நீங்கள் உங்கள் மனதில் பரிசுத்தமான ஆனந்தம் மற்றும் களிப்பை வளர்த்துக் கொள்வீர்களானால், உங்கள் இதயமும் சிவபெருமான் வசிக்கும் கைலாசமாகி விடும் ! பரிசுத்தமான ஆனந்தத்தை நீங்கள் எவ்வாறு அனுபவிக்க முடியும்? நீங்கள் தூய்மை,நிலைகுலையாமை மற்றும் புனிதத்துவத்தை வளர்த்துக் கொள்ளும்போது, ஆனந்தம் பிறக்கிறது. பின்னர் உங்கள் இதயமே, சாந்தி மற்றும் சந்தோஷத்தால் நிரம்பிய கைலாசமாக ஆகி விடும். பின்னர், உங்கள் உடல் எனும் ஆலயத்தில் உள்ள, இதயம் எனும் கற்பக்ரஹத்தில் சிவபெருமான் கொலுவீற்றிருப்பார்.