தனது சொந்த நலன் மற்றும் சந்தோஷத்தைப் பற்றியே மட்டும் சிந்தித்து இருப்பது , இருமை மனப்பாங்கின் சாபக்கேடாகும்.இது அதிருப்தியையும், துக்கத்தையும் உண்டாக்குகிறது.விருப்பு, வெறுப்பு உணர்வுகள் மனதை மாசு படுத்துகின்றன. மனதை, சேவையின் மூலம் தூய்மைப் படுத்த முடியும். ஒரு நாளில் பல முறை குளிப்பது, உடல் முழுதும் விபூதியைப் பூசிக்கொண்டு, இயந்திர கதியில் மந்திரங்களை உச்சரிப்பது போன்ற வெளிப்படையான சடங்குகள் ,மனதின் அழுக்குகளைக் களைய உதவி செய்ய மாட்டா. இவை, ஆன்மீகம் எதுவும் அற்ற, வெளிப்படையான படாடோபங்கள் மட்டுமே. மனிதனை, மிருக நிலையிலிருந்து உயர்த்த வல்ல, புலன்களுக்கு அப்பாற்பட்ட ஞானத்தை, புத்திசாலித்தனமான ஆராய்ச்சி மற்றும் நிலைகுலையாத இறைநம்பிக்கை ஆகியவற்றின் மூலம் பெற முடியும். இது, இந்நாளில் புறக்கணிக்கப் படுகிறது.அசத்தியத்தை சத்தியமாகக் கருதி, சத்தியத்தை அசத்தியமாகக் கையாண்டு, மனிதர்கள் நிலையற்ற பொருட்களை, நிரந்தரமானவை எனக் கருதி, அவற்றைக் குவித்துக் கொள்வதிலேயே ஆழ்ந்திருக்கிறார்கள். நீங்கள் இந்த குறுகிய மனப்பாங்கிலிருந்து வெளிவந்து, உங்களது சுயநல உந்துதல்களிலிருந்து மீண்டு, மனித குலம் அனைத்தும் ஒரே குடும்பம் எனக் கருதக் கற்றுக் கொள்ள வேண்டும். அதுவே உண்மையான சேவை. இன்று வெகு சிலருக்கே இப்படிப் பட்ட ஒரு விசாலமான இதயம் இருக்கிறது.