ஒரு வெள்ளப் பெருக்கெடுத்து ஓடும் ஆற்றில், உங்களால் நீந்த முடியாததால், நீங்கள் ஒரு படகில் ஏறுகிறீர்கள். அதைப் போலவே, நிர்குணமான இறைவனை அடைய, குணங்களுடன் கூடிய ஒரு ரூபத்தை ஏற்றுக் கொண்டு, வழிபாடு மற்றும் தியானத்தின் மூலம், நிர்குணமான இறைவனை நீந்தி அடையப் போராடுகிறீர்கள். ஆனால், நீரின் வேகம் மற்றும் சுழல்களுக்கு இடையே, நீங்கள் நிரந்தரமாக, படகிலேயே இருந்து விட முடியுமா? என்றாவது ஒரு நாள் நீங்கள் இந்த பாரம்பரிய வழிபாட்டை விட்டு விட்டு, கரை சேரத்தான் வேண்டும். உணர்வுகளுக்கு பாடம் கற்பிப்பதற்கான ஒரு முறையே வழிபாடுகள்.மனித உந்துதல்களும், உணர்வுகளும், வழி நடத்தப் பட்டுக் கட்டுப்படுத்தப் பட வேண்டும். எவ்வாறு பொங்கி வரும் கோதாவரியின் நீரோட்டத்தை, கரைகளால் தடுத்து, அணைகளால் நிறுத்தி,வாய்க்கால்களால் அடக்கி வைத்து அதன் அனைத்து வெள்ளத்தையும், ஒரு சுவடு தெரியாமல் விழுங்கக் கூடிய கடலுக்கு அமைதியாக இட்டுச் செல்ல வேண்டியுள்ளதோ, அவ்வாறே உங்களுள் காலம் காலமாக உள்ள உந்துதல்களை, உயர்ந்த இலட்சியங்கள் மற்றும் சக்திகளுடன் இணைய வைப்பதன் மூலம் பயிற்சி அளித்து, புடமிட வேண்டும். பழம் பழுத்துக் கனிந்தவுடன், தானாகவே, கிளையிலிருந்து விடுபட்டு விழுந்து விடும். அதைப் போலவே, துறவு மனப்பாங்கு உங்கள் இதயத்தில் முழுமையாக நிறைந்தவுடன், நீங்கள் இந்த உலக பந்தங்களிலிருந்து விடுபட்டு, இறைவனது மடியில், நழுவி விழுந்து விடுவீர்கள்.