அன்பு, அன்புக்காகத் தான் இருக்கிறதே அன்றி, வேறு எதற்காகவும் அல்ல; அது இயல்பானதும், இன்பம் அளிப்பதும் ஆகும்.அன்பு , இதயத்தால் காண்கிறது, கண்களால் அல்ல.அது உங்களது இதயத்தின் அமைதியின் மூலம் கேட்கிறதே அன்றி காதுகளால் அல்ல. அது ,பரிவுடன் பேசுகிறதே அன்றி, நாவினால் அல்ல. அன்பிற்கு, சில ஒத்த வார்த்தைகளும் உண்டு- கருணை,கனிவு போன்றவற்றின் பொருளும் அன்பே. அன்பு இதயத்திலிருந்துதான் ஊற்றெடுக்குமே அன்றி, வேறு எங்கிருந்தும் அல்ல. அன்பு, அமரத்துவமானது,அம்ருதமயமானது, ஆனந்தமயமானது, அளவற்றது. அன்பால் நிறைந்த இதயம், அபரிமிதமானதும் ஆகும்.எவ்வாறு பல நாமங்களைக் கொண்ட நதிகள், கடலில் கலந்து ஒன்றாக ஆகி விடுகின்றனவோ, அவ்வாறே, அன்பின் பல ரூபங்களும் உங்கள் இதயம் எனும் சாகரத்தில் சங்கமம் ஆகி விடுகின்றன. உங்களது சிந்தனைகள்,சொற்கள் மற்றும் பார்வைகள் அன்பால் நிரம்பியிருக்க வேண்டும். இதுவே தெய்வீக அன்பாகும். இந்த தெய்வீக அன்பில் தோய்ந்த ஒருவர், ஒருபோதும் துன்பத்திற்கு ஆளாக மாட்டார். இன்று மனிதர்கள் புகழ்ச்சி அல்லது இகழ்ச்சியால் பாதிக்கப் படுகிறார்கள்.ஆனால், தெய்வீக அன்பால் நிரம்பியவர்கள், போற்றுதல் அல்லது தூற்றுதலுக்கு அப்பாற் பட்டவர்கள். அவர்கள் இகழ்ச்சி அல்லது புகழ்ச்சியால் பாதிக்கப் படாது, இன்ப, துன்பங்கள், லாப, நஷ்டங்கள், வெற்றி ,தோல்விகளை ஒன்று போலக் கருதுவார்கள்.