ஆசைகள், மனத்திண்மை (இச்சா சக்தி) என்ற இரண்டுமே சிந்தனைகளிலிருந்து தான் எழுகின்றன. ஒவ்வொரு மனிதனின் ஜீவ தத்துவத்தைப் போன்று மிகவும் முக்கியமானது மனத் திண்மை. மற்ற சக்திகளான, புத்தி, புரிதல், தீர்மானித்தல், பேச்சு ஆகியவை அதிலிருந்தே வருகின்றன. இந்த மனத்திண்மையே மற்ற அனைத்து சக்திகளின் அரசன் போன்றது. ஒருவர், அதனைச் சரியாகப் பயன்படுத்தினால், அது, அவரைப் புனிதமான பாதையில் இட்டுச் செல்லும். மாறாக, ஒருவர் அதைத் தவறாகப் பயன்படுத்தினால், அந்த மனிதர் தீயவராக ஆகி விடுவார். மனத்திண்மை உங்களது சிந்தனைகளை பாதிக்கிறது; சிந்தனைகள் மனத்திண்மையை உருவாக்குகின்றன. தீய சிந்தனைகள், மனத்திண்மையை வலுவிழக்கச் செய்கின்றன. மனத்திண்மையின் சரிவு, ஆசைகளை வலுவாக்கி, இறுதியில் உங்களை வலுவற்றவராக ஆக்கி விடுகின்றன ! இங்கு ஒரு சின்ன உதாரணம். ஒருவர் அளவுக்கு மீறி காப்பி அல்லது டீ குடிப்பது, சிகரெட் புகைப்பது போன்ற பழக்கங்களைக் கொண்டு இருக்கிறார் என்று வைத்துக் கொள்வோம்; அவரது தீய பழக்கங்கள் அவரது மனத்திண்மை மற்றும் தலைசிறந்தவற்றைச் சாதிக்கும் திறன் ஆகியவற்றை, வலுவிழக்கச் செய்யும் அல்லவா? எனவே, நற்சிந்தனைகள், நல்ல பழக்கங்கள் ஆகியவற்றை அபிவிருத்தி செய்து கொண்டு, ஆசைகளுக்கு வரையறை என்பதைக் கடைப்பிடியுங்கள்.