சேவையினால் புனிதமாக்கப் படும் நேரம், அவர்களுக்கும், அவர்களால் சேவை ஆற்றப் படுபவர்களுக்கும், மிகச் சிறந்த பலன்களைத் தரும் என்பதை மக்கள் உணராதவர்களாக இருக்கிறார்கள். அனைத்து விதமான சேவைப் பணிகளும், ஒரே அளவு புனிதப்படுத்துவதோ அல்லது அவை அளிக்கும் பலன்கள் ஒரே மாதிரியானவையாக இருப்பதோ இல்லை. எப்போது சேவை, பதவி வெறி பிடித்தவர்களாலோ அல்லது பலவந்தத்தாலோ அல்லது போலியான உந்துதல்களோ ஆற்றப் படுகிறதோ, அப்போது, அது நல்லதை விடத் தீமையையே அதிகமாகச் செய்யும். தற்பெருமை அல்லது போட்டி மனப்பாங்கு அல்லது படாடோபம் போன்ற உந்துதல்கள், புனிதமான ஆன்மீக சாதனையான சேவைப் பணியை மாசுபடுத்தி விடும். இந்த ஆன்மீகச் செயல்பாட்டில் ஈடுபடுபவர் அஹங்காரம், ஆடம்பரம் மற்றும் அபிமானத்தைப் புறக்கணிக்க வேண்டும். எந்த ஒரு சேவைத் திட்டத்தைத் தொடங்குவதற்கு முன்பும், ஒருவர், தனது இதயம் தன்னலமற்ற ப்ரேமை, பணிவு மற்றும் பரிவினால் நிரம்பியுள்ளதா; பிரச்சனை மற்றும் அதற்கான தீர்வைப் பற்றி தனக்கு புத்தி கூர்மையான புரிதலும் அறிவும் இருக்கிறதா; தனது கரங்கள் ஆறுதல் அளிக்கும் வகையில் பணியாற்ற ஆர்வமாக உள்ளனவா: தான், மிகுந்த தேவையில் இருப்பவர்களுக்கு உதவ, தனது நேரம்,சக்தி மற்றும் திறனை சந்தோஷமாகப் பயன்படுத்த முடியுமா என்பதை எல்லாம் பற்றி கண்டிப்பாக சுய ஆய்வுப் பரிசோதனை செய்து கொள்ள வேண்டும்.