நீங்களே, உங்களது ஆசானாக ஆக வேண்டும். உங்களுள் பொதிந்து வைக்கப் பட்டுள்ள ஞானச் சுடரைப் பயன்படுத்தி, உங்களுக்கு நீங்களே பயிற்சி அளித்துக் கொள்ளுங்கள். ஒரு முறை நீங்கள் உங்களது முழு சக்தியுடன் முயன்றால், இறைவனது அருள் உங்களை முன் கொண்டு செல்ல உதவ அங்கு இருக்கும்.ஆன்மீக சாதனையின் முதல் படி உங்களது பேச்சைத் தூய்மைப் படுத்துவதுதான். கோபமின்றி, இனிமையாகப் பேசுங்கள். உங்களது பாண்டித்யம் அல்லது சாதனைகளைப் பற்றித் தம்பட்டம் அடித்துக் கொள்ளாதீர்கள். பணிவாகவும், சேவை செய்வதில் ஆர்வம் கொண்டவர்களாகவும் இருங்கள். பேச்சைக் குறைத்து, மௌனத்தைக் கடைப்பிடியுங்கள். இது உங்களை வீண் சண்டைகள்,வீணான சிந்தனைகள் மற்றும் பிரிவுகளிலிருந்து காப்பாற்றும். பிறர் சந்தோஷப்பட்டால் சந்தோஷம் கொள்வது, சுற்றி உள்ளவர்கள் வருத்தப் பட்டால் துக்கமடைவது என்ற மனப்பாங்கினைக் கடைப்பிடியுங்கள். உங்கள் இதயம் பச்சாதாபத்தால் இளகட்டும். ஆனால், இந்த துக்கமும், சந்தோஷமும், சேவையாக மாற வேண்டும்; அவை வெறும் உணர்வுகளாக மட்டும் இருந்தால் போதாது. ஆதவன் உதித்தவுடன் ஏரியில் உள்ள அனைத்து தாமரைகளும் மலர்வதில்லை; முதிர்ந்த மொட்டுக்கள் மட்டுமே அவைகளது இதழ்களை விரிக்கின்றன; மற்றவை அவைகளது நேரத்திற்காகக் காத்திருக்கின்றன. மனிதர்களும் அப்படியே தான். வித்தியாசங்கள், முதிர்ச்சி இன்மையினால் இருக்கின்றன; ஆனால், அனைத்து பழங்களும் கனிந்து, என்றோ ஒரு நாள் விழத்தான் போகின்றன என்பதை நினைவில் கொள்ளுங்கள். அவற்றின் நடை எவ்வளவு மெதுவாகவும், அவைகளது பாதை எவ்வளவு சுற்றிச் செல்வதாகவும் இருந்தாலும், ஒவ்வொரு ஜீவ ராசியும் தனது குறிக்கோளை அடையத்தான் செய்கிறது !