மனித ஜன்மம் என்பது மிகவும் துர்லபமானதும், புனிதமானதும் ஆகும். ( ஜந்தூனாம் நர ஜன்ம துர்லபம் ). ‘’ மானவ’’ என்ற வார்த்தைக்கு, ஒரு புனிதமானவன் என்றும் பொருளாகும். இப்படிப் பட்ட ஒரு புனிதமான ஒரு மனிதப்பிறவியை நாம் ஏன் கீழ்மைப் படுத்த முயலுகிறோம்? மனிதர்கள் பல நல்ல மற்றும் புனிதமானவற்றைப் பிரசாரம் செய்கிறார்கள்; ஆனால், அவற்றை நடைமுறைப்படுத்தும் போது, பின் வாங்கி விடுகிறார்கள். போதனைக்கும், செயல்பாட்டிற்கும் இடையே முரண்பாடு வரும்போது,அந்த நிலைமையை எதிர் கொள்வதற்கான தைரியம் உங்களிடம் இருக்க வேண்டும்; மேலும் புனிதமான பாதையில் செல்ல எல்லா முயற்சியும் எடுக்க வேண்டும். நீங்கள், அன்றாட வாழ்க்கையில் தீய குணங்களும், தவறான நடத்தையும் கொண்ட பலரை எதிர் கொள்ள வேண்டி வரும்.அவர்களுடைய நட்பு வட்டத்தில் சேர்ந்து விடாதீர்கள். அவர்களுக்கு ஒரு கும்பிடு போட்டு விட்டு, அங்கிருந்து நகர்ந்து விடுங்கள்.தீய மனிதர்களுக்கு ஏன் கும்பிடு போட வேண்டும் என்று நீங்கள் கேட்கலாம். நாம் நல்லவர்களை, அவர்களது நட்பை இழந்து விடக் கூடாதே என்பதற்காக நமஸ்கரிக்கிறோம். நாம், தீயவர்களையும், நம்மிடம் இருந்து விலகி விட வேண்டும் என்பதற்காக கும்பிடுகிறோம். நாம் நல்லவர்களின் நட்பில் இணைந்து,நற்குணங்களை வளர்த்துக் கொண்டு,ஒரு நல்ல வாழ்க்கையை நடத்துவதன் மூலம் , இந்த விலை மதிப்பற்ற வாழ்க்கையை புனிதமாக்கிக் கொள்ள வேண்டும்.