உங்களது இதயத்தை ஆட்டிப் பிடித்துக் கொண்டு இருக்கும் ரஜோ மற்றும் தாமஸிகப் படைகள் உங்களை வீழ்ப்பதிலேயே குறியாக இருக்கின்றன. இரத்த சோகையைக் குணப்படுத்துவதற்கு எவ்வாறு கால்சியம் மற்றும் வைட்டமின் மாத்திரைகளை கொடுக்கிறார்களோ, அவ்வாறே, மனதின் சோகை மற்றும் பிற வியாதிகளைக் குணப்படுத்த இறை நாமஸ்மரணை எனும் மாத்திரைகளை எடுத்துக் கொள்ளுங்கள். இறைவனது நாமம், மனம் எனும் ஹிரண்யகசிபுவை அழிக்க வல்ல நரசிம்மாவதாரம் போன்றதாகும். இருமலிலிருந்து விடுபட, சில குறிப்பிட்ட மாத்திரைகளை வாயில் மெதுவாகச் சுவைத்துப் பின் விழுங்குவதைப் போல, துன்பம் விளைவிக்கக் கூடிய உங்களது உணர்வுகள் மற்றும் உந்துதல்களின் பொங்கி வரும் எழுச்சியிலிருந்து விடுபட,இறை நாமத்தை உங்கள் நாவில் வைத்துக் கொண்டு, மெதுவாக அதனது சுவையை உள்வாங்கிக் கொள்ளுங்கள். இறை நாம ஜோதியை உங்கள் நாவில் ஏற்றி வையுங்கள்; அது உங்கள் அகத்தையும், புறத்தையும் ஒளி மயமாக்கும். அது உங்களது மனங்களையும், நீங்கள் உச்சரிக்கும் போது அதைக் கேட்பவரது மனங்களையும் கூட தூய்மைப் படுத்தும். நாவில் அதை வைத்துக் கொள்வது, உங்களது வீட்டின் வாசலில் விளக்கேற்றி வைப்பது போலாகும்.