சில ஆல மரங்கள் மிகப் பெரியதாகவும், பல கிளைகளைக் கொண்டதாகவும் இருக்கும்; பார்ப்பதற்கு மிகப் பெரிய மாளிகையைப் போலத் தோற்றமளிக்கும். ஆனால் அதன் விதையோ, கடுகளவே சிறியதாக இருக்கும். இவ்வளவு பெரிய ஆலமரம் இவ்வளவு சின்ன விதையில் இருக்கிறது என்பது உண்மையா அல்லது இது நமது ப்ரமையா? அது உண்மை என்பதை நாம் அறிவோம். இந்த விதை மிகச் சிறிய அளவில் இருக்கிறது; அதை நாம் பூமியில் இட்டு, நீரூற்றிப் போஷித்து வளர்த்தால், அது முளை விட்டு, வளர்ந்து , மிகப் பெரியதாகி விடுகிறது. பழங்கள், பூக்கள் மற்றும் இலைகள் என்ற அனைத்தும் இந்தச் சிறிய விதையிலிருந்தே வருகின்றன. அதைப் போலவே, உங்களது இந்தப் பெரிய உடலில், ஆத்மா எனும் மிகச் சிறிய விதை உள்ளது.நீங்கள் அதைப் போஷித்து, அது வளர்ந்து வளம் பெற, விட்டீர்களானால், அது இந்த பிரபஞ்சமயமான தெய்வீக ரூபத்தை வெளிக்காட்டும். ஆனால் இந்த விதையை நாம் எங்கே இடுவது, நாம் அதை எவ்வாறு காப்பாற்றி, பேணிக்காத்து மிகப் பெரிய மரமாக வளர விடுவது? நாம் இதை நமது உள்ளங்கையில் வைத்து, நீர் ஊற்றலாமா? ஒரு விதை பூமியில் இடப்பட்டு தகுந்த படி நீர் ஊற்றப் பட்டால் தான், ஒரு மரமாக ஆகும். அந்தப் பூமியில் கூட, அதை, நீங்கள் அதிக ஆழத்திலோ அல்லது மிகக் குறைந்த ஆழத்திலோ , இட்டால், அது மரமாகாது. நமது இதயும் எனும் நிலத்தில், இறை நாமம் எனும் விதையை இட்டு, அதை அன்பு எனும் நீரூற்றிப் பேணிக் காத்தால், அது நல்ல மரமாக வளரும்.