மனிதர்கள் பிறக்கும் போது அழுகிறார்கள். அவர்கள் இறக்கும் போதும் அழுகிறார்கள். இவைகளுக்கு இடையில் பல்வேறு விஷயங்களுக்காகவும் கூட அழுகிறார்கள். ஆனால், நாம் கேட்க வேண்டியது எல்லாம், பரப்பிரம்மத்தைப் பற்றிய ஞானத்தைப் பெற வேண்டும் என்பதற்காக மக்கள் அழுகிறார்களா? இறை அருளுக்காக அழுகிறார்களா? இறைவனைப் புரிந்து கொள்ளவும், அவனை உணருவதற்காக அழுகிறார்களா? வாழ்க்கையில் ஒவ்வொரு மனிதனின் விருப்பமும் சாந்தி,சந்தோஷங்களை அனுபவிக்க வேண்டும் என்பது தான்.ஆனால், நமது வாழ்க்கையில் சாந்தி, சந்தோஷங்கள் இல்லாமல் இருப்பதற்கான உண்மையான காரணத்தை அறிந்து கொள்ள நாம் முயற்சி எடுத்துக் கொள்கிறோமா? எதைத் தெரிந்து கொள்ள வேண்டுமோ அதைத் தெரிந்து கொண்டு, எதை மறக்க வேண்டுமோ அதை மறந்து, எந்த இடத்தை சென்றடைய வேண்டுமோ, அதைச் சென்றடைந்தால் தான், இப்படிப் பட்ட சாந்தி, சந்தோஷங்கள் இன்றி இருப்பதிலிருந்து நிவாரணம் கிடைக்கும். நாம் எதை மறக்க வேண்டும்? எதைத் தெரிந்து கொள்ள வேண்டும்? நாம் எதைச் சென்றடைய வேண்டும்? நாம் ஜீவாத்மாக்கள் என்ற அம்சத்தை மறக்க வேண்டும். நமது உண்மையான அந்தராத்மா என்ன என்பதைத் தெரிந்து கொள்ள வேண்டும். நாம் இறை நிலையைச் சென்றடைய வேண்டும்.