வெளியில் இருக்கும் பரப்ரம்மமான இறைவன் உங்களுக்கு நல்லவை அல்லது கெட்டவைகளை ஏற்படுத்துகிறான் என்றோ அல்லது அவன் உங்களுக்கு சில தண்டனைகளை அளிக்கிறான் என்றோ ஒரு தவறான எண்ணத்தை நீங்கள் கொண்டிருந்தால் அது சரியான மனப்பாங்கு அல்ல. ‘’பரப்ரம்மம்‘’ என்ற வார்த்தையால் நாம் விவரிக்க முயலும் சக்தி அல்லது வல்லமை உங்களுக்கு வெளிப்புறத்தில் இருக்கும் ஒன்று அல்ல. அது உங்களுக்குள்ளேயே இருப்பது; உங்களது ஆத்மாவிலேயே உள்ளதாகும். நீங்கள் எந்த விதமான விதைகளை விதைக்கிறீர்களோ அதைப் பொறுத்தே, நீங்கள் பெறும் பழங்கள் அமையும். விதை ஒரு வகையாக இருந்து, நீங்கள் வேறு விதமான ஒரு பழம் வேண்டும் என விரும்பினால், அது எவ்வாறு சாத்தியமாகும்? நீங்கள் அதி புத்திசாலியாக இருக்கலாம், ஆனால் நீங்கள் உங்களது கீழ்த்தரமான குணங்களை விட்டு விடவில்லை என்றால், அனைத்து புத்திசாலித்தனத்தினாலும் ஒரு பயனும் இல்லை. நீங்கள் எந்த விதமான நல்லவை அல்லது கெட்டவைகளைச் செய்திருந்தாலும், பரப்ரம்ம தத்துவம் அவற்றை நல்லவை, கெட்டவை என்ற தனித்தனி பாகங்களாக பிரித்துப் பார்க்கப் போவதில்லை. இறைவன் உங்களுக்கு, நீங்கள் சேர்த்து வைத்துள்ள அனைத்து நல்லவை மற்றும் அனைத்து கெட்டவைகளாலும் ஆன ஒன்றிணைந்த ஒரு மாலையையே தந்திடுவான்.