தங்களது கலாசாரத்தின் புனிதத்துவம் மற்றும் மதிப்பைப் புரிந்து கொள்வதில் பலர் நேரத்தை பயன்படுத்துவதே இல்லை. ‘’ கலாசாரம்’’ என்றால் அது உலகைப் புனிதப்படுத்தி,ஒரு நாட்டின் மேன்மை மற்றும் மகத்துவத்தைப் பெருக்கி,தனி மனிதன் மற்றும் சமுதாயத்தை, வாழ்வின் ஒரு உயர்ந்த நிலைக்கு எடுத்துச் செல்ல உதவும் ஒன்று என்ற பொருள் கொண்டதாகும். தினசரி வாழ்க்கையில் நல்லொழுக்கத்தைக் கடைப்பிடித்தல், வாழ்க்கையோடு சம்பந்தப்பட்ட அனைத்து எண்ணங்கள் மற்றும் செயல்களை தெய்வீகமாக்குதல், இலட்சியங்களைப் பற்றி ஒழுகுதல் – இவை அனைத்தும் சேர்ந்து இணைந்ததே கலாசாரமாகும். வாழ்க்கைக்கு மெருகூட்டுவதற்கு கலாசாரம் உதவுகிறது.எந்த ஒரு பொருளின் பயன்பாட்டை மேம்படுத்தவதற்கும், பண்படுத்துதல் அல்லது நிலைமாற்றம் மிகவும் அத்தியாவசியமானதாகும். உதாரணமாக, நெல்லை ஆலையில் இட்டு, உமியை நீக்கிய பின்னரே, அது அரிசியாக சமைக்கத் தகுந்ததாகிறது. இந்த முறையே ஸம்ஸ்க்ருதி அல்லது நிலைமாற்றம் எனப்படுகிறது.இதன் பொருள், தேவையற்றவற்றை நீக்கி விட்டு, தேவையான விரும்பத் தக்கவற்றைச் சேர்த்துக் கொள்வது என்பதாகும். மனிதர்களைப் பொருத்த வரை ஸம்ஸ்க்ருதி ( கலாசாரம்) என்றால்,தீய குணங்களை விடுத்து, நல்லொழுக்கங்களை வளர்த்துக் கொள்வதாகும். நல்லெண்ணங்களும், நன்னடத்தையும் கொண்ட ஒருவனே கலாசாரமுள்ள மனிதனாவான்.