சாஸ்திர நூல்களை வெறுமனே படித்தால் மட்டும் போதாது. நீங்கள் அனைத்து பாஷ்யங்களையும் கரைத்துக் குடித்து விட்டு, பெரிய பண்டிதர்களுடன், அவற்றைப் பற்றி விவாதிக்கக் கூடும்; ஆனால் அவை போதிப்பதைக் கடைப்பிடிக்காமல் இருந்தால்,அது கால விரயமே. புத்தகப் புழுவாக இருப்பதை நான் ஆமோதிப்பதில்லை; நடைமுறைப் படுத்துவதையே நான் மதிப்பிடுகிறேன்.நீங்கள் பரீட்சை ஹாலில் இருந்து வெளியே வரும்போது நீங்கள் தேர்ச்சி பெறுவீர்களா இல்லையா என்று, உங்களுக்கே தெரிந்து விடும் அல்லவா? ஏனெனில் நீங்கள் நன்றாக விடை அளித்தீர்களா இல்லையா என்று நீங்களே சீர்தூக்கிப் பார்த்து விடலாம். அதைப் போலவே, ஆன்மீக சாதனை அல்லது நடத்தை அல்லது பயிற்சியில் நீங்களே, கிடைக்கப் போகும் வெற்றி அல்லது தோல்வியை கணித்து விடலாம். சந்திரன் குடத்தில் உள்ள நீரில் பிரதிபலிக்கும்,குடத்தில் நீர் இருக்குமானால்; அதைப் போலவே, இறைவனை உங்கள் இதயத்திலேயே தெளிவாகக் காண முடியும், ப்ரேமை எனும் நீர் உங்களிடம் இருக்குமானால். உங்கள் இதயத்தில் இறைவன் பிரதிபலிப்பதை உங்களால் காண முடியவில்லை என்றால், இறைவனே இல்லை என்று கூறாதீர்கள்; அதன் பொருள் உங்களுள் ப்ரேமை இல்லை என்பது தான்.