அன்னமே வாழ்வின் முதன்மையான தேவை.அன்னமின்றி ஒருவர் வாழ இயலாது.எனவே,உயிரே,'' அன்னமயம்'', அதாவது அன்னத்தால் ஆனது எனப்படுகிறது.ஆனால் ஒருவர் அன்னத்தால் மட்டும் வாழ்வதால் திருப்தி அடைவதில்லை.வயிறு நிரம்புவதால் மட்டும் மனம் நிறைவடைவதில்லை. அன்னம் உடலுக்கு அத்தியாவசியானது என்றாலும்,மனம் ஆனந்தத்திற்காக ஏங்குகிறது. ஆனந்தத்தை அனுபவித்தால் மட்டுமே வாழ்க்கை முழுமை பெறுகிறது. எனவே,வெறும் உயிர் வாழ்வதால் மட்டும் நீங்கள் திருப்தி அடைந்து விட முடியாது.நீங்கள் சுறுசுறுப்பாகவும், எப்போதும் முன்னேறிக் கொண்டும் இருக்க வேண்டும்.இவ்வாறு இருக்கும் போது,ஒருவர் தன்னையே இந்தக் கேள்விகளைக் கேட்டுக் கொள்ள வேண்டும்- '' நான் ஏன் இப்படி அலை பாய்ந்து கொண்டு இருக்கிறேன்? நான் ஏன் இப்படி பணி ஆற்றிக் கொண்டே இருக்கிறேன்? நான் ஏன் இந்தச் செயல்களில் என்னை ஈடுபடுத்திக் கொண்டு இருக்கிறேன்? நான் ஏன் இந்தச் செயல்களைச் செய்கிறேன் ? நான் இவற்றை எவ்வாறு செய்கிறேன் ?''எப்போது ஒருவர் இந்த விஷயங்களைப் பற்றி ஆராய்கிறாரோ,அப்போது தான் இந்தச் செயல்களின் உண்மையான நோக்கத்தையும், அர்த்தத்தையும் புரிந்து கொள்ள முடியும்.இந்த ஆய்வு முறையான வழியில் செய்யப் பட வேண்டும். ஒரு முறை, ஒரு குறிப்பிட்ட செயல் சரியானது என்ற முடிவுக்கு நீங்கள் வந்து விட்டால், பின்னர்,அதை நீங்கள் முழு மனதுடன் ஆற்ற வேண்டும்.