ஒரு முறை ஸ்ரீ கிருஷ்ணரும், அர்ஜூனனும் ஒரு அழகான பாதை வழியாக ஒன்றாக நடந்து சென்று கொண்டிருந்தார்கள். ஆகாயத்தில் ஒரு பறவையைக் கண்ட ஸ்ரீ கிருஷ்ணர், அர்ஜூனனிடம், '' அது ஒரு புறா தானே?'' என்று கேட்டார். அர்ஜூனன் உடனே, '' ஆமாம். அது ஒரு புறாதான்'' என பதிலளித்தார். சில நொடிகள் கழித்து, ஸ்ரீ கிருஷ்ணர், ''அர்ஜூனா ! அது ஒரு கழுகு தானே ? '' எனக் கேட்டார். அதற்கு, அர்ஜூனன் '' ஆமாம் கிருஷ்ணா, அது கழுகு தான் '' என பதில் கூறினார். சில நொடிகள் கழித்து, ஸ்ரீ கிருஷ்ணர் ,'' அர்ஜூனா, அது கழுகு போலத் தோன்றவில்லை - அது ஒரு காகம் என எனக்குத் தோன்றுகிறது , இல்லையா? '' எனக் கேட்டார். அர்ஜூனன்,அதற்கும் '' ஆமாம், கிருஷ்ணா, அது சந்தேகம் இல்லாமல் காகம் தான் '' என விடையளித்தார். ஸ்ரீ கிருஷ்ணர் சிரித்து விட்டு, தான் எதைக் கூறினாலும், அவர் அதற்கு எல்லாம் ஒத்துப் போவதைக் கண்டித்தார். அர்ஜூனன், '' கிருஷ்ணா ! எனக்கு உனது வார்த்தைகள், என் கண்களின் சாட்சிகளை விட அதிகம் நம்பத் தக்கவை. நீ ஒன்று சொல்லும் போது, அது காகமோ,புறாவோ, கழுகோ, அதை அவ்வாறே மாற்றிவிடும் சக்தி உனக்கு இருக்கிறது. எனவே, நீ காகம் என்றால், அது அப்படித் தான் இருக்க வேண்டும் ! '' என பதிலளித்தார். ஐயமற்ற நம்பிக்கையே ஆன்மீகத்தில் வெற்றி பெறுவதன் ரகசியமாகும். இறைவன் பக்தனை விட, பக்தியை அதிகம் விரும்புகிறான் என்பதை எப்போதும் நினைவில் கொள்ளுங்கள்.