தேர்தலில் வெற்றி பெறுவது, ஒரு குறிப்பிட்ட காலம் வரைக்கும் தான் அதிகாரத்தை உறுதி செய்யும். அந்தக் காலம் முடிந்த பின், அரசியல்வாதி மறுபடியும், போட்டி இட்டு, ஓட்டுக்களை நாட வேண்டும்.அதைப் போலவே பற்றுதலுடன் செய்யப் பட்ட நற்காரியங்கள், சுவர்க்கத்தில் ஒரு இடத்தை உறுதி செய்யும்; ஆனால், அந்த வைப்பீட்டுத் தொகை செலவழிந்தவுடன், ஒருவன் மறுபடியும் இந்த பூமிக்குத் திரும்பி வந்தே ஆக வேண்டும். கையில் கொஞ்சம் பணத்துடன் ஒரு நகரத்திற்கு வருபவன், அனைத்து கடைகள்,சினிமாக் கொட்டகைகள்,விடுதிகள் மற்றும் டாக்ஸிகளுக்கு கையில் இருக்கும் பணம் இருக்கும் வரை தான் எஜமானன். கைப்பையில் பணம் காலி ஆகி விட்டால்,ஒரு வேளை டிக்கட் இல்லாத பயணியாகவோ, ஒவ்வொரு இடத்திலும் போலீஸ்காரர்களின் தொல்லைக்கு உள்ளாகியோ, திரும்பவும் தான் ஆரம்பத்தில் எந்த கிராமம் அல்லது நகரத்திலிருந்து வந்தானோ, அதற்கு தப்பி ஓடியே ஆக வேண்டும்! இல்லை , ஆத்மாவின் பசியைத் தீர்ப்பதற்கு சுவர்க்கம் ஒரு தீர்வு அல்ல. நதி கடலைத்தான் சென்று அடைய வேண்டுமே அன்றி பாலைவன மணல் பாங்கை அல்ல; நீர், நீரோடுதான் ஸங்கமம் ஆக வேண்டும். இந்த முழுமை அடைதல் தான் ' கைவல்யம் ' அல்லது ' ஸாயுஜ்யம் ' எனப் படுகிறது. அந்த ஒரு இறைவனோடு ஒன்றறக் கலக்கும் குறிக்கோளை எப்போதும் கவனத்தில் கொண்டு, அலை பாயும் உங்கள் மனதைக் கடிவாளம் கொண்டு கட்டுப் படுத்தி வையுங்கள்.