எண்ணெய்ப் பதார்த்தங்களையும், கொழுப்பும் பிசுபிசுப்பும் கொண்ட உணவுகளையும் நாக்கு சுவைக்கிறது; ஆனால் இவற்றால் அது பாதிக்கப்படுவதில்லை; எண்ணெய்ப் பசையும் அதில் ஒட்டுவதில்லை. அதைப் போன்றே, வெற்றி-தோல்வி, லாப-நஷ்டம், நலம்-நலமின்மை ஆகியவற்றின் அனுபவங்களால் மனமும் பாதிக்கப்படாமல் இருக்க வேண்டும்; அதை இறைவனின் பாதங்களில் அர்ப்பணித்து விட வேண்டும். இறைவனுடைய சங்கல்பத்தின்படியே அனைத்தும் நடக்கட்டும். உங்களுடைய சிறிய சங்கல்பத்தால் வரும் லாபம்தான் என்ன? ஐந்து நிமிடம் கண்களை மூடிக்கொண்டு உங்கள் முயற்சியால் உங்களுக்குக் கிடைத்த லாபத்தை எண்ணிப் பாருங்கள். ஒரு ஆசை மற்றொன்றுக்கு வழிவகுக்கிறது; ஒரு பந்தம் இன்னும் பத்து பந்தங்களைக் கொண்டு வருகிறது. முதலில் நீங்கள் திருமணம் செய்து கொள்கிறீர்கள்; பிற்காலத்தில் உங்களுக்கு மகள் பிறந்து, அவளுக்கு திருமணம் செய்ய வேண்டியுள்ளது; நீங்கள் படிக்கும் காலத்தில் படிப்பை முடிக்கப் போராடுகிறீர்கள்; பிற்காலத்தில் உங்கள் மகனின் படிப்பை முடிக்கக் கடுமையாக உழைக்கிறீர்கள்; அவன் தனது மகனின் படிப்பை முடிக்கக் கடுமையாக உழைக்கிறான். இப்படியே அது ஒரு முடிவில்லாச் சங்கிலித் தொடராக நீண்டுகொண்டே போகிறது. "இந்த ஒரு ஆசை நிறைவேறினால் போதும், இனி நான் எதுவுமே கேட்க மாட்டேன்," என்று நீங்கள் சொல்கிறீர்கள்; ஆனால் அந்த ஆசை நிறைவேறியவுடன் நீங்கள் என்னிடம் வந்து வேறேதாவது கேட்பீர்கள் என்று எனக்குத் தெரியும். மனித ஆசையின் இயல்பு அது; ஏனெனில், அந்த ஆசை நிறைவேறிய திருப்தியில் கிடைத்த மகிழ்ச்சி முழுமையற்றது, குறைவானது, தாற்காலிகமானது, துக்கம் நிறைந்தது. (தெய்வீக அருளுரை, மார்ச்03, 1965)