பச்சை சுரைக்காய் நீரில் மூழ்கி விடுகிறது; ஆனால் உலர்ந்த ஒன்றோ மிதக்கிறது. பற்றுதல்கள், ஆசைகள், சஞ்சலங்கள், கவலைகள் ஆகியவற்றை நீக்கி உலர்ந்த சுரைக்காயைப் போல ஆகி விடுங்கள். பின்னர், நீங்கள் சந்தர்ப்ப சூழ்நிலைகள் மற்றும் மாற்றங்கள் எனும் நீரால் பாதிக்கப்படாமல் அதில் மிதக்க முடியும். தண்ணீர் கூட ஆவியாக மாறும்போது வானில் உயரப் பறக்கிறது. நீங்கள் மேலும் மேலும் உயரும் வகையில், பாரத்தைக் குறைத்து, இலகுவானவர்களாக ஆகி விடுங்கள். யோகம் என்றால் ‘சித்த வ்ருத்தி நிரோதஹ’ - அதாவது மனிதனின் அந்தராத்மாவை உலுக்கும் உந்துதல்களைத் தடுத்தல் என்று பொருள். இந்த உந்துதல்கள் பாரத்தை அதிகமாக்குகின்றன. உங்களைக் கீழே தள்ளும் ஆசைகள் இன்றி இருங்கள்; சத்தியத்தை நேரில் தரிசித்திட வேண்டுமெனும் ஏக்கத்தை மட்டும் கொண்டிருங்கள். அந்த சத்தியம் உங்களுள் பிரகாசித்துக் கொண்டிருக்கிறது, நீங்கள் அதனைக் கண்டுணர வேண்டுமெனக் காத்திருக்கிறது. முழங்கால் அளவு நீரில் நின்றுகொண்டிருக்கும் சலவைத்தொழிலாளி தாகத்தால் தவிப்பதைப் போல, மனிதனும் கூட கைக்கெட்டிய தூரத்தில் அருமருந்து இருந்தாலும் அவதிப்பட்டுக் கொண்டிருக்கிறான். இறைவன் அந்தர்யாமி (இதயத்தின் உள் உறைபவன்); எனவே அவனை வெளி உலகில் தேடினால் அவன் அகப்பட மாட்டான். வேறெந்த சிந்தனையும் இன்றி அவனை நேசியுங்கள்; அவனின்றி வேறு எதற்கும் மதிப்பில்லை என்றும், அவனே அனைத்தும் என்றும் உணருங்கள். பின்னர், நீங்கள் அவனுடையவனாகவும், அவன் உங்களுடையவனாகவும் ஆகி விடுவீர்கள். (தெய்வீக அருளுரை, அக்டோபர்17, 1966)