பகவானின் பரிபூரண பாதுகாப்பை வெல்வதற்கு, பக்தி மார்க்கத்தைப் பின்பற்றி, முழு பக்தியுடன், இறைவனுக்கு தன்னையே அர்ப்பணித்துக் கொள்ள வேண்டும். அதை வேறு எந்த வகையிலும் பெற முடியாது. ஞான மார்க்கம் யாரோ கோடியில் ஒருவருக்கே சாத்தியமானது; மற்ற அனைவருக்கும் சாத்தியமானதல்ல. ‘நேதி, நேதி', அதாவது 'இது அல்ல, இது அல்ல’ என்று மீண்டும் மீண்டும் சொல்வதன் மூலமே, கண்கூடாக புலன்களுக்குப் புலப்படும் இந்த உலகையும் தேகத்தையும் மறுத்து ஒதுக்குவது அவ்வளவு எளிதாய் சாத்தியமா என்ன? இது சாத்தியமானால் தானே 'இது அல்ல, இது அல்ல’ என்ற புரிதலை செயலாக்கவும் இயலும்? இதை வைத்துப் பார்க்கும்போது, இன்றைய சூழ்நிலையில், ஞான மார்க்கம் மிகவும் கடினமான ஒன்றே. அனைவராலும் பின்பற்றக்கூடிய அளவிற்கு எளிதான ஒன்றல்ல. கர்ம மார்க்கத்தை எடுத்துக் கொண்டோமானால், அதுவும் கூட அவ்வளவு சுலபமானதல்ல. அதில் மனதைத் தன்வயப்படுத்த வேண்டும். அதுவும் கஷ்டமான பணியே. தூய பக்தி மற்றும் ப்ரேமையின் துணையில்லாமல் மனதைத் தன்வயப்படுத்துவது சாத்தியமில்லை. யோக மார்க்கமும் இப்படிப்பட்டதே. அதுவும் தடைகளும் ஏற்ற இறக்கங்களும் நிறைந்த ஒன்றே. எனவே, எல்லாவற்றையும் விட சுலபமானது, இதமானது, வெற்றிக்கு மிகவும் உகந்தது, பேரானந்தத்தை அள்ளித்தர வல்லது பக்தி மார்க்கம் ஒன்றே. (பிரசாந்தி வாஹினி,அத்தியாயம்-9)