"Happy" என்ற ஆங்கில வார்த்தைக்கு இணையான தெலுங்கு வார்த்தை ‘சந்தோஷம்’. இப்போது 'சந்-தோஷம்' என்ற சொல்லின் உட்பொருளை நாம் ஆராய்வோம். 'தோஷம்' என்பது 'பிரசன்னதா' - மகிழ்ச்சியைக் குறிக்கிறது. முன்னால் வரும் 'சம்' என்பது தார்மீகமான, நேர்மையான வழிகளில், பற்றின்மையாலும் தியாகத்தினாலும் பெறப்படும் மகிழ்ச்சியைக் குறிக்கிறது. தன்னை அடிமையாக்கி சிறைப்படுத்தும், துக்கத்தைத் தரும் ஆசைகளை ஒருவர் கைவிட வேண்டும். ஆசைகளை இரண்டு விதமாகப் பிரிக்கலாம். 1) வேறு யாரும் பெறாத ஒரு பொருள் அல்லது அனுபவத்தின் மீதுள்ள ஆசை 2) தான் பெற்ற பொருள் அல்லது அனுபவம் வேறு யாரும் பெறக்கூடாது என்ற ஆசை! இந்த இரண்டு ஆசைகளும் உண்மையில் அபத்தமானவை. விரும்பப்படுவது அனைத்தும் ஒருவருடைய நிழலைப் போல மாயையே! அதைக் கைப்பற்றும் நம்பிக்கையில் நீங்கள் எந்த அளவுக்கு வேகமாக அதை நோக்கி ஓடுகிறீர்களோ, அந்த அளவுக்கு கைக்கு எட்டாத தொலைவுக்குப் போய்விடுகிறது! நீங்கள் ஆசையைத் துரத்திக்கொண்டு அதன்பின்னே செல்லும்போது, அது ஓடிவிடுகிறது; நீங்கள் அதனைப் பற்றாமல் வெறுத்து ஒதுக்கி, வேண்டாமென்று உங்கள் முதுகைக் காட்டி திரும்பிச் சென்றால் உங்களைப் பின் தொடரும் நிழலைப் போல அது பணிந்து வருகிறது. பேராசையினால் ஆசைகள் பிறக்கின்றன. பேராசை குறையக்குறைய அதிருப்தியும் அதே அளவுக்குக் குறைகிறது. மேலும், அதிருப்தி மறைந்தவுடன் மகிழ்ச்சி நிலைபெறுகிறது. (தெய்வீக அருளுரை, நவம்பர்23, 1983)