நீங்கள் புதுவிதமான தலைவர்களாக ஆவதற்குக் கற்றுக்கொள்ள வேண்டும்; எவ்வாறெனில், சேவையே சாதனை எனும் உலையில் உருவாக்கப்பட்டவர்களாக, பள்ளியிலும் கல்லூரியிலும் பயின்றவர்களாக, கடந்த கால அனுபவத்தின் அடிப்படையில் நிகழ்கால மற்றும் எதிர்காலப் பிரச்சனைகளைக் கையாளுவதில் தேர்ச்சி பெற்றவர்களாக, பாரம்பரியத்தையும் கலாச்சாரத்தையும் போற்றும் தலைவர்களாகத் திகழ வேண்டும். இந்தப் பணிக்காகவே நீங்கள் உங்களைத் தயாராக்கிக் கொள்ள வேண்டும். பணி என்பதற்கான தெலுங்கு வார்த்தை ‘உத்யோகம்’ என்பதாகும். உத்-யோகம் என்ற சொல்லைக் கவனியுங்கள்; ‘உத்’ என்பது மேல்நோக்கிய, உயர்கின்ற, வெளிப்படுகின்ற என்ற பொருள் கொண்டது. அதாவது, யோகத்தின் முன்னேற்றம் தான் பணியின் தன்மையையும் நோக்கத்தையும் தீர்மானிக்கிறது. யோகம் என்றால் என்ன? யோகம் என்பது, பதஞ்சலி முனிவர் சொல்வது போல், ‘சித்த விருத்தி நிரோதஹ’ - அதாவது மனக்கிளர்ச்சிகள், கவலைகள், பயம் ஆகியவற்றைக் கட்டுப்படுத்துவதே ஆகும். அரசு நிர்வாகத்தின் பொறுப்பில் உள்ளவர்கள் பல்வேறு கட்டுப்பாடுகளை வகுத்து, அவற்றை பிரபலப்படுத்த பிரச்சாரம் செய்து வருகின்றனர். உணவுக் கட்டுப்பாடு, தங்கக் கட்டுப்பாடு, குடும்பக் கட்டுப்பாடு, பிற திட்டங்கள் என பலவற்றை அவர்கள் வைத்துள்ளார்கள். ஆனால் மிகவும் அடிப்படைத் தேவை மனக் கட்டுப்பாடு; அதைக் காணோம்! நீங்கள் ஒரு குளிர்சாதன அறையில் அமர்ந்திருக்கலாம், ஆனால் உங்கள் மனம் கோபம், பொறாமை, பேராசை, பயம் ஆகியவற்றால் கலக்கமடைந்திருந்தால், அறை மிகவும் சூடாகவே இருப்பதாக உங்களுக்குத் தோன்றும்! (தெய்வீக அருளுரை,ஜூலை23, 1970)