காற்று காற்றுடனும், நெருப்பு நெருப்புடனும், தண்ணீர் தண்ணீருடனும் சேரும்போது எளிதாகக் கலந்து ஒன்றாகிவிடுகிறது; அதேபோல், இறைவன் ஜோதி வடிவமாக இருக்கிறான். நீங்களே ஜோதியாக ஆகி விடுங்கள்; நீங்கள் பிரபஞ்சமயமான இறைஜோதியுடன் கலந்து ஒன்றாகி விடுவீர்கள். இறைவன் ரூபமற்றவன். ரூபமற்ற இறைவனுடன் ஐக்கியமாவதற்கு நீங்கள் உடல் பற்றை விட்டுவிட வேண்டும். நீங்கள் எப்போதும் உடல் மீது பற்று கொண்டவராக இருந்தால் பிரபஞ்ச தத்துவமான ஆத்மாவை எவ்வாறு உணரமுடியும்? ஆத்ம தத்துவத்தின் மீது கவனம் செலுத்துங்கள். அப்போதுதான் ஜீவாத்மா பரமாத்மாவுடன் இணையும். இறைவனுடன் இவ்வாறு ஐக்கியமாவதே ‘சாயுஜ்யம்’ எனப்படுகிறது. ஏகாத்மா சர்வபூதாந்தராத்மா - எல்லா உயிரினங்களிலும் உள்ளது ஒரே ஆத்மாதான். இருப்பது ஒன்றே ஒன்றுதான், ஆனால் அதற்கு பல்வேறு நாம ரூபங்கள் சூட்டப்பட்டுள்ளன. அந்த ஒன்றுதான் உள்ளது. ஜீரோவுக்கு முன் ஒன்று என்ற எண் இருந்தால்தான் ஜீரோவுக்கு மதிப்பு கிடைக்கிறது. உலகம், வாழ்க்கை, சூரியன், சந்திரன், ஆகாயம், மற்ற அனைத்தும் ஜீரோ (zero) ஆகும். இறைவன் ஒருவனே ஹீரோ (Hero) ஆவான். மனிதன் இறைவனை மறந்தால் ஜீரோ ஆகிவிடுகிறான். ப்ரேமையின் திருவடிவங்களே! இறைவன் உங்களிலிருந்து வேறுபட்டவன் அல்ல. நீங்களே இறைவன். இந்த உண்மையை ஆராய்ந்து புரிந்து கொள்ளுங்கள். வாழ்க்கை முழுவதையும் ஆராய்ச்சியிலும் சோதனைகளிலும் கழித்துவிட்டால், நீங்கள் எப்போது கடைப்பிடிக்கப் போகிறீர்கள்? நாம, ரூபங்கள், அணுகுமுறைகள் ஆகியவற்றால் தனிநபர்கள் வேறுபடலாம், ஆனால் ஆத்மா மாற்றமே இல்லாத ஒன்றாகும். (தெய்வீக அருளுரை, நவம்பர்23, 1998)