இராமனின் முதன்மையான போதனை, ஒருவர் சத்தியத்தைப் பின்பற்ற வேண்டும் என்பதே. சத்தியத்தை அடிப்படையாகக் கொண்டு, ஒருவர் தர்மத்தை நிலைநாட்டி வளர்க்க வேண்டும். தர்மம் என்பது எந்த ஒரு குறிப்பிட்ட இடத்திற்கு அல்லது நாட்டிற்கு மட்டுமே உரித்தானதல்ல; அது அனைத்திலும் உள்ளது. அது சத்தியத்திலிருந்து தோன்றியதாகும். உண்மையில் தர்மம் என்பது சத்தியமின்றி இருக்க முடியாது. தர்மம் என்றால் என்ன? ‘தாரயதி இதி தர்மஹ’ - அதாவது எது போஷித்துக் காக்கிறதோ அதுவே தர்மம். ஏழைகளுக்கு உணவளிப்பது, தானதருமங்கள் செய்வது ஆகியவை மட்டுமே தர்மம் என சிலர் தவறாகக் கருதுகிறார்கள். தர்மம் என்பது ஒருவருடைய இதயத்திலிருந்து வெளிப்பட வேண்டும். பின்னர், அதை நடைமுறைப்படுத்த வேண்டும். நீங்கள் என்ன சொல்கிறீர்களா, அதன்படி நடந்து காட்டுங்கள்; அதுவே மனிதனின் தலையாய கடமையாகும். ஒருவரின் சொற்களுக்கும் செயல்களுக்கும் இடையே சரியான இசைவு இருக்க வேண்டும். மாறாக, ஒருவர் சொல்வது ஒன்றாகவும், செய்வது வேறாகவும் இருக்குமானால், அது அதர்மத்தைக் குறிக்கிறது. உங்களுடைய சிந்தனைகள், சொற்கள், செயல்கள் ஆகியவை இசைவுடன் இருந்தால்தான், நீங்கள் மனிதன் என்று அழைக்கத் தகுந்தவர்கள். இராமன், சிந்தனை, சொல், செயல் ஆகியவற்றின் இசைவைப் பெற்றிருந்தார்; மாறாக, இராவணனின் சிந்தனைகள், சொற்கள், செயல்கள் ஆகியவை ஒன்றுக்கொன்று முரணாக இருந்தன. (தெய்வீக அருளுரை, ஏப்ரல் 07, 2006)