ஐம்பது வருடங்கள் ஐந்து நிமிடங்களாக சுருக்கப்பட்டு, வினோதமான சம்பவங்களும் விஷயங்களும் உண்மையிலேயே இருப்பதாகவும் அவற்றை அனுபவிப்பதாகவும் உங்களை உணர வைக்கக் கூடிய கனவு உலகம் ஒரு அபத்தமான அற்புத உலகம் என்பதை நீங்கள் அறிவீர்கள். ஆனால் மெய்யுணர்வு நிலையிலிருந்து பார்த்தால், விழிப்பு நிலை கூட அதைப் போன்றே பொய்யானது என்றே நான் கூறுவேன். எனவே, மதிப்புத்திறத்தைக் கொண்டிருங்கள், அதிலும் மதிப்பிடும் அளவுகோலை வைத்திருங்கள்; ஒவ்வொன்றுக்கும், ஒவ்வொருவருக்கும் தகுந்த மதிப்பை இம்மியளவு கூட மிகாமல் சரியாக அளித்திடுங்கள். பஞ்சகோசங்கள், ஆத்மாவைச் சூழ்ந்துகொண்டு அதன் மகத்துவம் வெளிப்படாமல் மறைக்கின்றன. இவை அனைத்தையும் பரிசுத்தமாகவும் பிரகாசமாகவும் ஆக்குங்கள். ‘அன்னமய கோசம்’ - நல்ல, சுத்தமான, தூய்மையான உணவாலும்; ‘ப்ராணமய கோசம்’ - அமைதியான, நிலையான சுவாசம் மற்றும் சீரான மனநிலையாலும்; ‘மனோமய கோசம்’ - புலன்களின் பற்றுதலால் தீண்டப்படாத, சுகதுக்கங்களால் பாதிக்கப்படாத புனித சிந்தனைகளாலும் உணர்வுகளாலும்; ‘விக்ஞானமய கோசம்’ – ஆத்ம தியானத்தாலும்; ‘ஆனந்தமய கோசம்’ - இறைஉணர்வில் ஆழ்ந்திருக்கும் ஆனந்தப் பரவசத்தாலும், பரிசுத்தமாக்கப்பட வேண்டும். (தெய்வீக அருளுரை, பிப்ரவரி 26, 1961)