இறைவன் எங்கும் நீக்கமற நிறைந்திருப்பதை அறியாதவர்கள் மதம், ஜாதி, இனம் ஆகியவற்றின் அடிப்படையில் தங்களுக்குள் பகைமையை வளர்த்துக் கொள்கிறார்கள். இறைவன் காலாதீதன், எங்கும் நீக்கமற நிறைந்திருப்பவன் என்பதை எல்லா மதங்களும் ஏற்றுக்கொள்கின்றன. எனவே, இந்த உண்மையை ஏற்றுக்கொள்பவர்கள் கூட இத்தகைய குறுகிய மனப்பாங்கினைக் கொண்டிருப்பது விந்தையாக உள்ளது. ஏனெனில், வெவ்வேறு மதங்களைச் சார்ந்தவர்களுக்கு இடையிலுள்ள வெறுப்பு, இறுதியில் மதத்தின் மீதான நம்பிக்கையையே அழித்துவிடும். மதத்தை அழிப்பதில் குறியாக இருப்பவர்கள் முற்றிலும் அறிவற்றவர்களாக இருக்க வேண்டும். அழிக்கப்பட வேண்டியது மதவெறியே தவிர மதத்தை அல்ல. தன் மதத்தின் மீதுள்ள அன்பினால் பிற மதத்தை இகழ்வது என்பது, பிறருடைய அன்னையரின் பெருமையைக் குலைத்து தன் அன்னை மீதுள்ள அன்பை வெளிப்படுத்துவது போலாகும். ஒருவர் தன்னுடைய மதத்தின் மீது கொண்டிருக்கும் அதே அளவு மதிப்பும் பக்தியும், மற்றவர்களும் தத்தம் மதத்தின் மீது கொண்டுள்ளனர் என்பதை ஒருவர் உணர வேண்டும். இன்றைய இளைஞர்கள், தங்களுடைய மதத்தின் மீது பற்றுதலை வளர்த்துக் கொள்ளும் அதே நேரத்தில், மற்ற அனைவருடைய மத நம்பிக்கைகளையும் வழக்கங்களையும் மதிக்க வேண்டும். (தெய்வீக அருளுரை, ஜூலை 24, 1983)